Piñán, sobre la oficialidá: «Falta un votu pero tengo'l convencimientu de qu'a lo llargo d'esta llexislatura podemos llegar»
AGORA
La conseyera de Cultura quier «dibuxar un Asturies con una identidá propia, que nun excluyente, que ye la que vien a buscar el turismu».
12 feb 2020 . Actualizado a las 09:06 h.La conseyera de Cultura, Política Llinguística y Turismu, Berta Piñán, afirmó esti martes que falta'l votu d'un diputáu de la Xunta Xeneral pa poder aprobar una reforma del Estatutu d'Autonomía qu'incluya la oficialidá del asturianu, pero tien el «convencimientu» de que va ser posible a lo llargo d'esta llexislatura.
Nuna entrevista na RPA recoyida por Europa Press, la conseyera esplicó que la oficialidá nun depende namás de les intenciones de la so Conseyería, porque una reforma del Estatutu d'Autonomía tien qu'aprobase na Xunta Xeneral por 27 de los 45 diputaos. Nestos momentos, los partíos que llevaben la oficialidá nel so programa electoral --FSA-PSOE, Podemos Asturies y IX-- sumen 26, ún menos de los necesarios.
«Falta un votu, pero eso nun quier dicir que nun tengamos la ilusion y el convencimientu de qu'a lo llargo d'esta llexislatura podemos llegar a esa confluencia y esa coxuntura especifica que nos lo permita», indicó. Nesi sentíu, sobre onde podríen tar esos posibles apoyos afirmó que camienta que «cualquiera que creyera n'Asturies, en que tenemos posibilidades de la meyor Asturies, d'un desarrollu cada vez más optimista de la nuestra cultura y como seña identitaria de la nuestra economía y del nuestru proyectu común como sociedá, tendría qu'apoyar la oficialidá».
Un puntu onde recordó los beneficios económicos y pal turismu qu'al so xuiciu supondría la oficialidá. Nesi puntu, indicó que llegaríen partíes d'Europa y del Estáu pa la política llingüística, amás de que supón «dibuxar un Asturies con una identidá propia, que nun excluyente, que ye la que vien a buscar el turismu».
Otra manera, sobre'l plazu marcáu pa poder aprobar esi marcu llegal, la conceyera quixo más nun falar de feches y comentó que «nel tiempu más próximu posible meyor» porque «trabayaríemos n'otru marcu llegal que nos permetiría avanzar a más velocidá».
Con too, esplicó la falta d'oficialidá «nun quita pa siguir avanzando» n'otres cuestiones de política llingüística, ente les que destacó la puesta en marcha de les primeres pruebes d'asturianu adaptaes al marcu européu, amás d'otres cuestiones rellacionaes cola educación o la toponimia. Asina, fixo apueste por dar «normalidá» a la cuestión llingüística pa dar la «sensación de que cuando lleguemos a la oficialidá cuasi nun nos enteremos porque ya tenemos avanzáu esi terrén con una cierta naturalidá».