«Nun se pue falar de respetu pol asturianu y depués facer de menos al profesoráu», responde l'ALLA a Celaá

Xosé Antón González Riaño diz que «la oficialidá faise cada vez más necesaria y urxente. Vémoslo tolos díes»

Academia de la Llingua
Academia de la Llingua

El presidente de l'Academia de la Llingua Asturiana (ALLA), Xosé Antón González Riaño, respondió a la ministra d'Educación y Formación Profesional, Isabel Celaá, que «nun se pue falar de respetu pol asturianu y depués facer de menos al profesoráu».

Nun apunte en twitter recoyíu n'Europa Press, el presidente de l'ALLA posicionóse sobre les palabres de Celaá d'esti miércoles depués d'aconceyar cola conseyera d'Educación d'Asturies, Carmen Suárez, na sede del Ministeriu en Madrid.

La ministra manifestó que tien «un respetu grande» pol asturianu como «por toles llingües del Estáu», pero'l so Ministeriu va esperar a que sía llingua oficial pa convertir les sos enseñances n'especialidá docente, dalgo qu'esixe un cambiu de los reales decretos d'especialidaes n'educación. Celaá recordó amás que «les necesidaes o demandes» de clases n'asturianu «tán cubiertes».

Nesi sentíu, el presidente de l'Academia afirmó que nun se pue falar de respetu pol asturianu «y depués facer de menos al profesoráu». «La oficialidá faise cada vez más necesaria y urxente. Vémoslo tolos díes, ministra Celaá», escribió Riaño en twitter.

La especialidá d'asturianu

L'aprobación de la Especialidá Docente pal profesoráu d'Asturianu, dalgo qu'esixe un cambiu nos reales decretos d'especialidaes, que son competencia del Ministeriu. Nellos, tendría qu'establecese que se pue aprobar la especialidá docente pa llingües qu'anque nun son oficiales tienen protección llegal y una política llingüística desarrollada pola comunidá autónoma, como ye'l casu de la llingua asturiana; informó Europa Press.

Trátase d'una midida que los principales sindicatos educativos asturianos --CCOO, UXT, Suatea y CSI-- vienen reclamando, al afirmar que la so falta supón que los más de 400 profesores qu'imparten asturianu nun puen presentase a oposiciones, tener una plaza fixa o optar a un concursu de tresllaos.

Nel ámbitu políticu, tolos partíos asturianos apoyen esta midida o, polo menos, lleváronla en dalgún momentu nel so programa. Mesmamente, nel 2009, el PP foi'l que presentó na Xunta Xeneral una proposición non de llei pa la creación de la especialidá docente d'asturianu.

El Parllamentu asturianu aprobó nos últimos años delles resoluciones pa que dende Madrid punxeren en marcha esta midida, anque'l PP suel votar en contra. Nel 2014, l'apoyu a la creación de la especialidá sumó a PSOE, IX, Foru Asturies y UPyD.

N'avientu del 2019, la conseyera d'Educación, Carmen Suárez, comprometióse col presidente de l'Academia de la Llingua Asturiana (ALLA), Xosé Antón González Riaño, a que cuando haya en Madrid un Gobiernu operativu diba demandar al ministru d'Educación futuru l'aprobación de la Especialidá d'Asturianu.

Esti miércoles en Madrid, la conseyera recordó que «ta pendiente» que l'asturianu sía llingua oficial n'Asturies, y si se produz esa situación van poder tratase aspectos como la especialidá y la ufierta de places a docentes nes mesmes condiciones qu'otres especialidaes educatives.

«Esperamos que pueda dir tratándose dientro d'un contestu d'estudiu, analís y consideración sobre cómo va ser nel futuru d'Asturies, pero les enseñances n'asturianu yá tienen el so propiu currículum y profesoráu contratáu cuando existe esa necesidá», añadió la conseyera Suárez.

Comentarios

«Nun se pue falar de respetu pol asturianu y depués facer de menos al profesoráu», responde l'ALLA a Celaá

Cola ayuda de