Anovar la Revolución Verde

Xuan Porta
Xuan Porta REDACCIÓN

AGORA

Productos ecológicos
Productos ecológicos

06 mar 2020 . Actualizado a las 05:00 h.

Dende l'aniciu l'agricultura va unos 10.000 años hebo un xorrecimientu constante de la productividá de los cultivos y de la ganadería donda. La seleición natural y la esbilla de semientes y d'animales pa la reproducción llograron esti avance, xunto a la meyora de la so xestión. Ello foi dable mientres la humanidá yera poco numberosa.

Nos trenta caberos años del sieglu XX prodúxose más arroz, trigu y maíz fundamentalmente, gracies a la ciencia aplicada al rendimientu nos países probes. Ello ye lo que se nomó Revolución Verde. Sofitada nes meyores infraestructures y teunoloxíes qu'aportaron a los pequeños agricultores.

La llende que supunxo'l descomanáu enclín demográficu haza enriba na superficie disponible pa l'agricultura pal caltenimientu la biodiversidá y los ecosistemes naturales, fizo un parón d'esti procesu. Qu'a la fin dio como resultáu'l porgüeyu a les grandes empreses y nun esanició la fame nel mundiu.

Agora, quiciabis, seya l'entamu d'una segunda Revolución Verde col añedíu de la producción ecolóxica de los alimentos. Sostenibilidá, equidá y salú pal sieglu XXI. 

Los nuevos problemes rellativos al amenorgamientu la diversidá biolóxica, el cambéu climáticu y la seca mundial abren otros caminos que puen anovar la Revolución verde nuna cultura de consumu más sana, basada ente otres coses, na producción d'alimentos ecolóxicos y merca en comercios de prosimidá, torgando les grandes cadenes de producción industrial de vexetales y animales.

La nueva llinia d'esta nueva Revolución basaríase na meyor distribución de los porgüeyos económicos pa los productores, na mayor investigación agraria, y na meyora de la producción ganadera y l'acuicultura, torgando la inseguridá alimentaria y espardiendo'l desendolcu medioambiental sostenible. Un mou ye espardir la dieta vexetariana na pirámide alimentaria como encamienta la Estratexa NAOS (Nutrición, Actividá física y Prevención dela Obesidá). Ye siguir la estratexa de la OMS, XE y otres organizaciones internacionales de la salú p'amenorgar les tases de mortalidá por malures non tresmisibles. Dende'l so entamu nel 2005 desendolca aiciones basaes na ciencia en tolos ámbitos sociales pa una vida más saludable y activa. Nel añu 2011 impulsóse cola Llei de seguridá alimenticia y nutrición.

Toos podemos ser parte de la Revolución Verde y contribuyir a un mundiu más sostenible. Con pequeñas aiciones podemos facer grandes cambeos. El tema de reducción de plásticos na vida cotidiana ye ún d'ellos. Los microplásticos inciden nel cáncanu , malures cardiovasculares y del sistema ñervosu  o reproductivu. Tienen efeutos nos animalesy en cuasi toles estayes de la organización biolóxica. Les autoridaes puen prohibir ciertos plásticos, puxar polos biodegradables. Los consumidores refugar los d'un solu usu. La industria y los gobiernos reciclar y torgar qu'aporten a los ríos y océanos.

Foi nos años sesenta del sieglu pasáu cuando entamó a furrular esta idega de Revolución Verde que llogró producir alimentu enforma pa tola humanidá. Llueu tornóse nuna fonte de bayura pa les grandes empreses y l'oxetivu foi incumplíu. Amás l'aumentu de la sobrepoblación del planeta aidó al desfase caberu.

Nes sociedaes más desendolcaes surde a modín una necesidá de cambéu nos usos y costumes desarrollistes que puxa pol usu de los recursos más equilibráu, respetuosu cola natura y más equitativu. Esti nuevu estilu de vida, si algama una cantidá grande de siguidores, pue ser la esperanza p'algamar l'anovamientu calidable de la Revolución Verde.