La Selmana de les Lletres aplázase hasta la seronda

El Gobiernu d'Asturies alcordó cola ALLA l'aplazamientu depués de la declaración del estáu d'alarma

Día de les lletres asturianes
Día de les lletres asturianes

El Gobiernu asturianu y l'Academia de la Llingua Asturiana anunciaron l'aplazamientu hasta la seronda próxima de la 41 edición de la Selmana de les Lletres, prevista pa primeros del mes de mayu, coincidiendo col Día de les Lletres Asturianes, que tamién queda aplazáu.

El Gobiernu d'Asturies, de común alcuerdu cola Academia de la Llingua Asturiana (ALLA), anunció nuna nota de prensa esti vienres que considera que la situación actual de la crisis del coronavirus, depués de la declaración del estáu d'alarma y el decretu de les midíes de confinamientu, aconseya l'aplazamientu de los actos previstos.

Asina, va ser na seronda, en feches «que van marcase y anunciase más alantre». La Selmana de les Lletres diba ser ente los díes 4 y 8 del mes de mayu, coincidiendo cola celebración el 8 de mayu del Día de les Lletres Asturianes pola Academia de la Llingua Asturiana, que tamién foi retardáu hasta la seronda viniente.

Nesta ocasión, la Selmana de les Lletres Asturianes que se conmemora anaulamente dende 1980, ta dedicada a recuperar la figura de la escritora María Teresa Villaverde (1881-1934), popularmente conocida col seudónimu de Tuxa. Ente otros actos, el programa incluye la celebración del tradicional Día del Llibru y de la Música n'asturianu y gallego-asturianu.

«Esti aplazamientu garantiza la organización y normal celebración de la principal cita anual de la lliteratura escrita n'asturianu y en gallego-asturianu», señalaron dende'l Principáu.

Per otru llau, n'otru comunicáu, l'ALLA anunció que tenía yá «bien avanzada» la xera organizativa del cuarentenu primer Día de les Lletres Asturianes, previstu pal 8 de mayu y n'onde, ente otro, taba programada la entrega del II Premiu Nacional de Lliteratura Asturiana al escritor Xuan Xosé Sánchez Vicente.

«En respuesta a esti aplazamientu sobreveníu y necesariu, l'Academia piensa yá nun diseñu alternativu del actu que se desenvuelve anualmente alredor de la xunta estraordinaria de la Institución», indicaron, informó Europa Press.

Comentarios

La Selmana de les Lletres aplázase hasta la seronda

Cola ayuda de