«Palabres guapes y xuegos florales nes redes», afirma la XDLA sobre la política llingüística del Gobiernu de Barbón

La Voz REDACCIÓN

AGORA

Imaxe de la campaña
Imaxe de la campaña

La organización afirmólo asina depués de la campaña institucional que busca adaptar el consumu de sidra a la crisis sanitaria, con 40.000 vasos pal usu personalizáu con mensaxes que namás tán en castellanu

14 may 2020 . Actualizado a las 13:11 h.

La Xunta pola Defensa de la Llingua Asturiana (XDLA) acusó esti xueves al Gobiernu d'Adrián Barbón de «mantener en cuarentena a la llingua asturiana» depués d'un añu de les elecciones autonómiques, p'añadir que la política llingüística del Executivu básase en «palabres guapes y xuegos florales en redes sociales». La organización afirmólo asina depués de la campaña institucional de la Conseyería d'Industria pa promover el consumu del comercio local y la de la DOP Sidra d'Asturies que busca adaptar el consumu de sidra a la crisis sanitaria, con 40.000 vasos pal usu personalizáu con mensaxes que namás tán en castellanu.

Al traviés de nota de prensa, la XDLA calificó la campaña titulada «Comercio de Asturias. Más cerca que nunca» de «estratexa enquivocada» al defender el consumu de lo local «ensin tener presente la realidá llingüística que-y val de vehículu pa espresase». Otra manera, recordaron a la DOP que'l vocabulariu tradicional de la sidra ye n'asturianu y insistieron en que l'usu de la llingua propia ye «la manera meyor de marcar la diferencia y la calidá dientro d'un contestu global».

Nesi sentíu, la XDLA acusó al Gobiernu asturianu de «mantener en cuarentena a la llingua asturiana». «Depués d'un añu de les elecciones autonómiques, vemos que poco cambió», indiquen, p'añadir que la política llingüística del Executivu básase en «palabres guapes y xuegos florales en redes sociales». «Eso nun val pa salvar un idioma en peligru de desapaición. Ye la hora de los fechos: la llingua asturiana tien que formar parte del procesu de reconstrucción social y económicu que se ponga en marcha y estes campañes dexen ver que'l Gobiernu d'Adrián Barbón nun tien esa intención», sentencien.