Los albergues temporales d'Uviéu y Xixón puestos en marcha pol andanciu acoyeron a 162 persones
AGORA
Nel Grupu d'Acción Social del Comité d'Emerxencies d'Asturies yá se ta trabayando na busca de soluciones pa cada persona ensin casa una vez acabe l'estáu d'alarma
20 may 2020 . Actualizado a las 20:10 h.Los albergues temporales d'Uviéu y Xixón puestos en marcha pol andanciu de la COVID-19 acoyeron a un total de 162 persones, según indicó la Delegación de Gobiernu. Desque se decretó l'estáu d'alarma pa frenar la espansión de los contaxos por COVID-19, el Grupu d'Acción Social del Comité d'Emerxencies d'Asturies reforció les midíes sociales p'atender a les persones socialmente más vulnerables. Esti organismu, coordináu pola Delegación del Gobiernu n'Asturies y nel que participen el Gobiernu del Principáu, la Federación Asturiana de Conceyos, Protección Civil, 112 Asturies y Cruz Bermeya Asturies, decidió a mediaos de marzu poner en marcha los dispositivos necesarios pa facilitar el confinamientu de les persones ensin casa que nun cuntaben con nengún otru tipu de protección social.
Asina, el 19 de marzu habilitóse'l pabellón deportivu de La Tejerona gracies a la ufierta del Conceyu de Xixón. Unos díes depués, el 27 de marzu, adaptóse l'Albergue Xuvenil Ramón Menéndez Pidal, de titularidá del Gobiernu del Principáu. Dambes instalaciones tán xestionaes dende entós por Cruz Bermeya Asturies cola collaboración de Protección Civil; los Conceyos d'Uviéu y de Xixón realicen llabores de vixilancia nos edificios; y el Gobiernu del Principáu encargase de que les persones agospiaes tengan cubiertes les sos necesidaes alimentarias. Los dispositivos tán coordinaos pola Delegación del Gobiernu n'Asturies.
Nel Grupu d'Acción Social del Comité d'Emerxencies d'Asturies yá se ta trabayando na busca de soluciones pa cada persona ensin casa una vez acabe l'estáu d'alarma. Ente los usuarios repartiéronse 19.200 menúes, 667 kits d'hixene, 677 ayudes térmiques y 3.000 mázcares y guantes. Nestos momentos hai 90 persones agospiaes ente los dos centros temporales, y desque se punxeron en marcha atendieron a 162. El perfil del usuariu mediu foi un home asturianu d'ente 51 y 60 años ensin recursos económicos.