El Conseyu de la Mocedá esixe al Principáu que «rectifique'l recorte» en polítiques de mocedá
AGORA
Afirmen que supón dexar con «cero euros» a programar actividaes y serviciu n'entidaes xuveniles, proyectos d'emancipación n'empléu y vivienda y el programa Culturaquí
20 may 2020 . Actualizado a las 20:02 h.El Conseyu de la Mocedá del Principáu d'Asturies (CMPA) pidió al Gobiernu asturianu que rectifique la decisión de dexar ensin dineru una serie de programes dependientes del Institutu Asturianu de la Mocedá (IAM). Asina, dende'l CMPA califiquen una resolución de la Conseyería de Presidencia publicada esti martes nel Boletín Oficial del Principáu d'Asturies (BOPA) que modifica'l plan estratéxicu de subvenciones. El «recorte» supón dexar con «cero euros» a programar actividaes, servicios a mozos y funcionamientu internu d'asociaciones y entidaes xuveniles, contratación de mozos menores de 30 años pa qu'ufran serviciu n'entidaes xuveniles, proyectos d'emancipación n'empléu y vivienda y el programa Culturaquí, qu'apoyaa los proyectos artísticos de mozos asturianos.
Dende'l CMPA, entienden la situación esceicional y almiten que, poles circunstancies pol andanciu de COVID-19, podríen asumir ún amenorgamientu del presupuestu, pero manifiesten que la supresión d'estes llinies de subvención, que permiten la realización de programes d'ociu y tiempu llibre, apoyu, educación non formal o insertamientu llaboral de mozos, munchos d'ellos en riesgu d'esclusión social, suponen «un erru graven y suponen un precedente malu». Recuerden qu'una gran mayoría de les entidaes xuveniles volcáronse cola respuesta social a la crisis, ufriendo ayuda y servicios de primera mano, y una vez más, atoparon cola falta d'apoyu de l'Alministración.
Añaden, al traviés d'una nota de prensa, que la mocedá asturiana yá taba en situación d'emerxencia social enantes de la crisis sanitaria na tasa d'emancipación, empléu y riesgu d'esclusión social. Critiquen que la Conseyería de Presidencia y la Dirección Xeneral adoptaren una decisión «tan drástica» de forma unillateral ensin cuntar col conxuntu de les entidaes sociales. Per otru llau, consideren que la Dirección Xeneral de Mocedá yá cuntaba de forma ordinaria con un presupuestu curtiu, y col amenorgamientu anunciáu, prácticamente nun va xestionar nengún programa, informa Europa Press.