La XDLA diz que la oficialidá ye «inaplazable». Iniciativa critica que PP y Ciudadanos sí faigan campaña en gallegu al otru llau de la ría del Eo
02 jul 2020 . Actualizado a las 09:23 h.El presidente de l'Academia de la Llingua, Xosé Antón González Riaño, afirmó que l'aprobación del reglamentu nuevu de la Xunta Xeneral pa permitir l'usu del asturianu ye «un avance na dignificación de la llingua y, al empar, un llogru democráticu».
Nun apunte en twitter recoyíu por Europa Press, Riaño posicionóse sobre qu'esti miércoles, el plenu del parllamentu, por 27 votos a favor, 13 en contra y 5 astenciones, aprobara una reforma del Reglamentu de la Cámara pa garantizar el derechu a usar l'asturianu nel parllamentu autonómicu.
Los diputaos del Grupu Socialista, de Podemos, d'IX y de Foru apoyaron el dictame de la Comisión de Reglamentu, onde se deroga l'artículu 11 del Reglamentu de la Xunta Xeneral, que facía namás mención a que los diputaos podíen utilizar l'asturianu nel exerciciu de les sos funciones parllamentaries.
Agora, añádese al Reglamentu un artículu nuevu que diz: «Nel marcu de lo dispuesto pol Estatutu d'Autonomía y, nel so casu, pola llexislación que lo desenvuelva, tanto los Diputaos nel exerciciu de les sos funciones parllamentaries como los miembros del Conseyu de Gobiernu, los cargos y empleaos públicos y cualquier persona que compareza énte la Cámara van poder utilizar el bable asturianu».
Oficialidá inaplazable
La Xunta pola Defensa de la Llingua (XDLA) reclamó la oficialidá como una cuestión «inaplazable». Nesi sentíu, recordaron que la reforma del reglamentu de la Xunta Xeneral pa permitir falar n'asturianu «restrínxese» al usu parllamentariu.
En declaraciones a Europa Press, el portavoz de la organización Carlos Pulgar, calificó de positivo que la mayoría de los diputaos votaren a favor d'esta reforma «dando'l llombu a planteamientos antidemocráticos».
Sicasí, Pulgar calificó de «espectáculu» l'actitú de PP y Vox «que defendieron nes sos turnos de palabra y col so votu la prohibición del usu de la llingua asturiana». «Nun ye que nun quieran que se protexa, ye que quieren prohibila», indicó.
Amás, el portavoz de la XDLA señaló qu'anque col reglamentu nuevu tol mundu va poder falar n'asturianu na Xunta Xeneral «el restu de ciudadanos, na cai, vamos siguir careciendo la falta d'un marcu llegal que reconoza los mesmos derechos llingüísticos que'l restu de ciudadanos del Estáu».
Campaña en gallegu al otru llau de la ría del Eo
Iniciativa pol Asturianu reclamó esplicaciones a PP, Cs, Vox y Pedro Leal (Foru) por votar en contra de la reforma del reglamentu de la Xunta Xeneral y por nun dar «llibertá pal usu del asturianu tal y como establez la Llei d'Usu»
Al traviés de nota de prensa, la organización calificó de positiva la modificación del reglamentu apoyada polos grupos de FSA-PSOE, Podemos Asturies, IX y el diputáu de Foru Adrián Pumares. Nesi sentíu, animaron a los diputaos a formase en casu de que nun remanen la llingua asturiana «porque la meyor política de normalización y dignificación del idioma ye l'usu públicu del mesmu».
Del mesmu mou, criticaron que PP y Ciudadanos faigan campaña en gallegu al otru llau de la ría del Eo y apoyen la oficialidá y la normalización del gallegu «y equí n'Asturies siguen aneciando en postures contraries contra midíes absolutamente de mínimos, como ye la llibertá d'usu del idioma nel parllamentu asturianu».
Otra manera, condenaron les palabres del diputáu de Vox Ignacio Blanco que dixo nun querer entender asturianu, «lo que demuestra una absoluta falta de respetu a los ciudadanos y ciudadanes que representa, asina como una demostración de la obstentación de la inorancia».