El Gobiernu d'Asturies creó un comité de participación con menores que viven en centros de titularidá autonómica
23 jul 2020 . Actualizado a las 20:07 h.El Gobiernu d'Asturies creó un comité de participación con menores que viven en centros de titularidá autonómica, coles mires d'integrar a los sos miembros nos conseyos municipales de participación infantil y, d'esta forma, tomar en consideranza les sos opiniones y fomentar la so autonomía personal nel procesu de transición a la vida adulta.
L'oxetivu ye qu'estos mozos treslladen les sos esmoliciones a los responsables de la Conseyería de Derechos Sociales y Bientar, amás de trabayar na so hestoria de vida, promocionar la so inclusión nos procesos de toma de decisiones y fomentar l'espíritu críticu, asambleariu y democráticu.
Van recoyese, tamién, los sos puntos de vista sobro'l funcionamientu de los centros de menores y los sos analises p'adoptar ameyoramientos si fueren necesarios, informa'l Gobiernu asturianu.
Esti comité de participación, que celebró esta mañana la primer mesa de trabayu con menores, organízase en tramos d'edá y cuenta con trés grupos: unu pa 6 a 11 años, otru de 12 a 14 y otru de 15 a 17.
Estos 20 neños representen a 393 residentes nos 17 centros d'Asturies y van axuntase de forma periódica n'Uviéu, Xixón y Avilés, y una vegada al trimestre va haber un alcuentru nel que van participar menores de les tres ciudaes.