Palabres pa una pandemia

Les busques sobre gripe o neumonía disparáronse na Wikipedia n'asturianu nel mes de marzu


Enzarraos meses en casa, hubo palabres qu'antes malpenes s'usaben y que de secute empezaron a pasar a forma parte de les conversaciones cotidianes. En cualesquier llingua y, anque la esperiencia individual queda pa caún, una forma de midir de qué se ta falando ye coles busques na Wikipedia.

La enciclopedia asturiana nun ye una escepción, nel mes de marzu, la busca de la entrada del artículu sobre Neumonía disparóse penriba de les 2.000 visites cuando la media mensual en cualesquier otru momentu del añu apenes pasa de les 500.

Sobre'l coronavirus en concretu, la primer entrada de la Wikipedia asturiana, qu'empecipiaría un llargu viaxe de midida de datos y semeyes de cais vacíes nes ciudaes d'Asturies foi «Andanciu de COVID-19 de 2020 n'Asturies» y empezó'l 5 de marzu. Agora tien otru nome Pandemia de coronavirus de 2020 n'Asturies.

Víctor Suárez, alministrador de la Wikipedia n'asturianu, señaló qu'entamó l'artículu «como una forma de facer un seguimientu personal de la evolución de la enfermedá n'Asturies cuando nun esperábemos el desenllaz que llueu tuvo. Col repunte de casos y el shock del confinamientu sirvióme un poco como terapia, porque'l fechu d'organizar la información y dir sabiendo qué ye lo que pasa y qué midíes se tomen, a min me relaxa. D'otra manera, anque tuvi ayuda d'otros usuarios, el volume de datos y d'información foi talu que tuvi que rebaxar el mio nivel d'implicación cola actualización del mesmu por salú mental. Yera difícil actualizar los datos de persones finaes en díes onde les cifres yeren mui altes».

Lo cierto ye que la versión asturiana de Wikipedia actualizóse a un ritmu frenéticu nes selmanes de marzu. Yá nel día 5 crecieron les visites pa los artículos creaos sobre'l Covid-19 y la entrada sobre'l Coronavirus que redirixe al nome científicu d'Orthocoronavirinae.

Pandemia yá yera una entrada esistente na enciclopedia asturiana pero disparó tamién l'interés colos socesos de la primavera; daqué asemeyao a lo que s'asocedió coles entraes dedicaes a enfermedaes como'l gripe o la neumonía.

El primer infectáu por coronavirus n'Asturies foi l'escritor Luis Sepúlveda, que finó por cuenta de la enfermedá tres una llarga estancia hospitalaria; tuvo'l so artículu'l 10 de marzu y diez dempués publicóse unu dedicáu a la llocalidá portuguesa de Póvoa de Varzim, onde supuestamente s'infectara.

Como interés, la entrada dedicada a Wuhan yá esistía na Wikipedia asturiana dende l'añu 2017. 

Comentarios

Palabres pa una pandemia

Cola ayuda de