Barbón va ser el segundu presidente d'Asturies qu'asista al Día de les Lletres depués de Pedro de Silva

Facía trente años qu'un presidente nun participaba nesti actu institucional

Academia de la Llingua
Academia de la Llingua

Redacción

El presidente del Principáu d'Asturies, el socialista Adrián Barbón, va acudir esti vienres 2 de mayu a la Xunta Estraordinaria de l'Academia de la Llingua Asturiana pol XLV Día de les Lletres. Facía trente años, dende la época de Pedro de Silva, qu'un presidente nun participaba nesti actu institucional.

L'actu nun pudo celebrase en marzu pola crisis sanitaria, polo que la Xunta Estraordinaria de l'Academia va facese esti vienres, a les 12.00 hores nel Aula Magna de la Universidá d'Uviéu, que garra'l testigu del Teatru Campoamor pola situación sanitaria.

Na sesión va acoyese al académicu correspondiente nuevu, Pablo Rodríguez Medina, y Xuan Xosé Sánchez Vicente va recibir el Premiu Nacional de Lliteratura Asturiana. Amás, l'actu va contar cola asistencia del presidente Adrián Barbón, polo que'l socialista va convertise nel segundu mandatariu qu'asista a esti actu institucional dende que Pedro de Silva dexara la presidencia del Principáu en 1991.

Barbón yá participó los dos años anteriores nel actu del Día de les Lletres, anque esta va ser la primer vez que tea nel actu como presidente, porque les dos anteriores foi como secretariu xeneral de la FSA. L'añu pasáu tamién asistió Luisa Carcedo, nesos momentos ministra de Sanidá, convirtiéndose na primer miembru d'un Conseyu de Ministros que participaba nel actu más solemne que tien como protagonista a la llingua asturiana.

Comentarios

Barbón va ser el segundu presidente d'Asturies qu'asista al Día de les Lletres depués de Pedro de Silva

Cola ayuda de