Groucho Marx, asesor d'Ayuso

Isabel Díaz Ayuso
Isabel Díaz Ayuso

El célebre y almiráu Groucho Marx nunca tuvo mui seguru de ser daveres un actor cómicu, pese a que ganare una gran fortuna «faciéndose pasar por comediante». Seya como seya, Groucho plantegábase que si volviera a nacer necesitaría amás de la «intelixencia brillante de Kissinger y el fégadu a prueba de bombes de Dean Martin», la bona planta de Steve McQueen. El casu ye que muncha xente nun sabe que Groucho foi investigáu pol senador McCarthy debío a que consideraba que’l so apellíu, Marx, yera una prueba suficiente p’acusalu de comunista; y ye que’l senador, como taba abondo obsesionáu col tema, foi capaz de convencer de la necesidá d’una «caza de bruxes» debío a la terrible conspiración comunista nel mesmu senu del Departamentu d'Estáu. Ello ye que Groucho, un home adelantáu al so tiempu, foi mui almiráu y queríu, pese al so inoportunu apellíu, y enxamás necesitó’l cerebru de naide porque poseyía una intelixencia superior. Les sos famoses frases inxenioses, anque mui mordaces, «fueron producto d’una neurosis compulsiva». Al cabo y al fin foi un esclavu de la so chispa. Por esti motivu, el Hollywood más conservador nun-y tenía apreciu pol so empeñu en criticar a les persones con poder que namás pensaben «n’enllenar los sos bolsos y aumentar la so barriga a costa del trabayu ayenu». 

Nun m’atrevo a pronosticar cómo reaccionaría l’actual presidente d’Estaos Xuníos, el narcisista y prepotente Donal Trump, si Groucho volviera otra vuelta a la vida. Ye difícil entender la mente d’un home que pa la so primer campaña electoral foi capaz de ponese nel pelleyu del malváu más temible de Avengers: Endgame. El casu ye qu’a Jim Starlin criticó duramente que’l so presidente imitare a unu de los sos personaxes. Paecía-y increyible dafechu qu’un fatu babayu usare la so creación «p’afalagar el so ego infantil”, pero asina yeren les coses: el líder del so país y del mundu llibre esfrutaba daveres “comparándose con un asesín de mases».

Toi segura de que si Groucho tuviera güei con nós diba convertise nel rei de los tuiteros, y si pa la desgracia del mundu mundial, Trump gana nos comicios de payares, ofrecería-y un puestu na Casa Blanca, y asina l’odiu y l'insultu rápidu qu’enmanen de los sos twuits sedríen sustituyíos por un perfinu sentíu de la ironía y un agudu absurdu qu’allabaría tol mundu. De toles formes, Groucho, depués del culebrón protagonizáu pola política espectáculo dirixida por una muyer que llogra que toles sos actuaciones s’eleven al máximu nivel del surrealismu más esperpénticu, refugaría la oferta del presidente d’Estaos Xuníos. Ensin duldar, Groucho escribiría un twiter a la señora Ayuso pidiendo-y ser el so asesor personal. Ello ye que, como a esti humorista-y prestaba escribir, nun duldó en mandar unes cuantes cartes al mesmu presidente Truman. Lo increyible ye qu’hasta el mesmu senador Welch-y contestare col mesmu tonu d'ironía que la unviada pol actor cuando lu felicitó por defenestrar al nocivu senador McCarthy. ¿Cómo nun diba querer tar al llau de la señora Ayuso si Groucho nació con un radar especial pa reconocer el talentu, seya de la clase que seya? Fue unu de los primeros n'emponderar a Woody Allen cuando daba los sos primeros pasos nel cine. Nuna entrevista llegó a dicir que yera mentira que Woody s’inspirare nos hermanos Marx. «La única verdá ye que va trenta años, nós inspiráramos n'él».

Ensin dulda, si la presidenta en vez de nacer na comunidá de Madrid en 1978    llega a nacer en Nueva York un sieglu más tarde, sedría considerada la célebre cómica de les frases más surrealistes del mundu: «La política ye l'arte de buscar problemes, atopalos, facer un diagnósticu falsu y aplicar depués los remedios equivocaos”. Y con toa seguranza la señora Ayuso respondería ofendida a delles entruges: ¿Por quién me tomó?, yo tengo unos principios... y si nun-y gusten tengo otros». De toles maneres, por razones obvies, enxamás pronunciaría aquella famosa frase que diz: «Ye meyor permanecer calláu y paecer tontu que falar y acabar coles duldes pa siempres». El casu ye que munches de les ayusaes puen pasar mui guapamente por grouchaes. Y la selmana pasada fizo un hito enxamás visto, hasta tal puntu que superó al rei del humor. Dixo que yera necesario facer un recursu pa que les xentes de Madrid pudieren salir de la capital, al tiempu que, cuando los xueces anularon les órdenes del gobiernu central, aconseyó a los madrilanos que fueren sensatos y nun se-yos ocurriera salir de la capital el fin de selmana. Pues eso: si el célebre Groucho Marx nun taba mui seguru de ser un actor cómicu, Ayuso, tampoco, pese a que ye sabío que fai la comedia a toles hores. Lo malo ye que dende’l día que tomó posesión ta provocando grandes traxedies, n’especial en tiempo de pandemia, porque, como tol mundu sabe, ella foi, ye y, llamentablmente siempres va ser, d’aquella manera. Namás me queda una dulda: ¿Atreverase Ayuso a dir a la manifestación que convoca Vox pola llibertá el 12 d’Ochobre en Madrid? Dende llueu nun hai dulda que-y apetez porque, al igual que Groucho, camienta que «nun hai nada como la llibertá; eso sí, sacante una cerveza un día de calor».

Comentarios

Groucho Marx, asesor d'Ayuso

Cola ayuda de