Les academies gallega, vasca y catalana reciben partíes d'alredor de 300.000 euros
02 nov 2020 . Actualizado a las 10:57 h.Nin siquiera con un gobiernu de coalición de PSOE y Podemos nel Estáu llogróse que'l proyectu de presupuestos incluya una partida destinada p'apurrir fondos a l'Academia de Llingua Asturiana, nin siquiera una asemeyada a la que sí reciben instituciones similares n'otres comunidaes con llingua propia.
El proyectu presentáu esta selmana recueye más de 300.000 euros pa les academies gallega y catalana y más de 200.000 pa la vasca (anque s'inclúin partíes añadíes pa otres instituciones venceyaes al euskera). Distintes fontes esplicaron que diputaos asturianos, como Sofía Castañón por Podemos, o Roberto García Moris, del PSOE, manifestaron el so compromisu de que nesta ocasión l'asturianu nun sufriera esti agraviu pero finalmente, a lo menos nel borrador, nun se recoyó nenguna propuesta.
La demanda de que l'ALLA reciba una partida dende l'Estáu arrástrase dende fai dellos exercicios y, en función del color políticu del Gobiernu, los partíos fueron variando la so posición al respeutu. N'ocasiones hubo enmiendes presentaes por Izquierda Xunida pa que la academia asturiana recibiera'l mesmu tratu, tamién lo fixo Foro nel pasáu y los socialistes demandáronlo a executivos populares.
En 2018 foi una fuerza ayena a Asturies, Compromís, nel Senáu, la que plantegó una enmienda pa que se dedicaren 100.000 euros a l'ALLA. Naquella ocasión, tolos senadores asturianos, seis en total, votaron en contra de la iniciativa. Fueron Fernando Goñi, Mario Arias y Ovidio Sánchez pol PP; María Luisa Carcedo y Vicente Álvarez Areces pol PSOE y Rosa María de Posada per Foru.
La demanda, entamada por Iniciativa pol Asturianu en 2013, ye que l'ALLA reciba dende l'Estáu una cifra d'alredor de 200.000 euros, similar a la partida que s'inclúi nos presupuestos asturianos lo que llograría doblar los sos recursos.