Testos infantiles y xuveniles protagonicen el númberu 36 de «Lliteratura»

La Voz

AGORA

La revista de l'Academia de la Llingua Asturiana dedica una segunda estaya a la creación lliteraria, l'ensayu y la crítica

08 nov 2020 . Actualizado a las 05:00 h.

L'Academia de la Llingua Asturiana vien d'asoleyar el númberu 36 de la revista Lliteratura. Revista lliteraria asturiana correspondiente al añu 2020. Nesti númberu, de 173 páxines, baxo la direición de la escritora y académica Marta Mori, atópense dos estayes de la revista claramente definíes y que bien podríen iguar dos númberos perfectamente dixebraos: una primer estaya especial dedicada a la Lliteratura Infantil y Xuvenil (LLIX) y una segunda estaya que coincide colos conteníos habituales de la revista.

A lo llargo de les sos páxines combínase la creación lliteraria, l'ensayu y la crítica, y les voces nueves apaecen xunto a voces yá consagraes. «Esti exemplar pue valir al empar d’amuesa del llabor lliterariu de güei y como material pal aula no que cinca a la Lliteratura Infantil y Xuvenil», espliquen na academia. 

Asina, les 100 páxines dedicaes a la Lliteratura Infantil y Xuvenil (LLIX) abren colos poemes d'Aurelio González Ovies, Esther García López, Marisa López Diz y Sidoro Villa Costales. Darréu d’ello, atopánse los rellatos de Carlos González Espina, Dolfo Camilo Díaz, Enrique Carballeira, Helena Trexu Fombella, Iris Díaz Trancho, Mari Luz Pontón, Miguel Solís Santos, Montserrat Garnacho Escayo, Nel Morán, Xurde Fernández y Marian García. 

Una tercer faza d'esta seición ye la del teatru, con pieces pequeñes de Laura Iglesia San Martín, Maite González Iglesias y Pablo Rodríguez Medina. Tamién hai sitiu pal ensayu colos trabayos de Vicente García Oliva y Severino Antuña, onde esti últimu fai un repás al canon de la LLIX. 

Zarren esta primer estaya de la revista les reseñes de Mar Martín Martín, Blanca Fernández, Ramón Cueva y Ruth González sobre dalgunes de les obres de LLIX asoleyaes nesti últimu añu. 

La segunda parte de la revista, que correspuende a les collaboraciones y la distribución avezaes, abre cola estaya de poesía: Alejandra Sirvent, Armando Vega, Belén Rico Prieto y Laura Marcos. Darréu d'ella, inxértase la parte dedicada a la narrativa, colos testos de Pablo X Suárez, Gonzalo Llamedo Pandiella, María Fernández Abril y Paquita Suárez Coalla. A continuación, atópase la entrevista de Fernando Cid Lucas al direutor y actor asturianu Etelvino Vázquez. 

Nes fueyes vinientes, Vicente García Oliva, con motivu del XXV cabudañu de la muerte de María Teresa González, ofrez una visión de los modelos de muyer na poesía de l’autora. La penúltima seición d'esta revista ye la dedicada a la traducción, na qu'Inaciu Galán vierte un testu de Quim Monzó y Miguel Sánchez Canella torna dos poemes tamién dende'l catalán.

Piesllen esti númberu les reseñes de Marta López Fernández -con un repás xeneral al panorama lliterariu de 2019-, Marcos Martínez Fernández, Diego Solís, José Angel Gayol, Marta Mori y Alba Sánchez Batalla, que repasen dellos títulos asoleyaos nos últimos años.