La conseyera de Cultura destacó la convocatoria d'encargos de producción pa programes n'asturianu, dotada con 130.000 euros, que recibió 48 propuestes
05 nov 2020 . Actualizado a las 12:10 h.La conseyera de Cultura, Política Llingüística y Turismu, Berta Piñán, afirmó esti llunes que considera que la cultura y la música n'asturianu y gallego-asturianu tienen una presencia «digna» na programación de RTPA, «pero non abondo».
«Entá pue facese una promoción mayor de les manifestaciones culturales y artístiques, especialmente de la creación n'asturianu y gallego-asturianu, que faiga llegar a la sociedá asturiana la riqueza y la diversidá de les sos producciones, contribuyendo a la profesionalización del sector y ayudando a superar la crisis actual xenerada pol andanciu», afirmó Piñán na Comisión del ramu de la Xunta Xeneral, onde-y entrugó por esta cuestión el diputáu de Podemos Asturies Rafael Palacios.
Nesi sentíu, la conseyera consideró la programación n'asturianu y gallego-asturianu de RTPA «digna, pero non abondo» y señaló qu'asina-ylo treslladó a los responsables de los medios públicos. «L'oxetivu d'esta Conseyería ye que la presencia del asturianu y del gallego-asturianu aumente en formatos de tou tipu», indicó.
Per otru llau, destacó la convocatoria d'encargos de producción pa programes n'asturianu y gallego-asturianu convocada por RTPA y la mesma Conseyería, dotada con 130.000 euros, pero que recibió 48 propuestes que sumaríen más d'un millón d'euros.
A la convocatoria presentáronse productores que nun trabayen con RTPA, lo qu'al so xuiciu ye «una muestra de vitalidá d'un sector que tenemos qu'ayudar a consolidar». «La RTPA ye un preséu pa llevar la cultura a los asturianos nestos tiempos d'andanciu, polo que la Conseyería tien l'interés de buscar víes nueves de collaboración», sentenció.
Pr otru llau, Rafael Palacios recordó'l manifiestu firmáu por más de cien persones de la cultura asturiana a favor de la presencia de les llingües propies nos medios públicos y denunció que desque empezó la llexislatura «RTPA dedicó 0 euros a la producción de conteníos nes llingües d'Asturies».
«Nun tien nengún sentíu que los conteníos n'asturianu y gallego-asturianu páguelos la Conseyería de Cultura, cuando RTPA tien 23 millones de presupuestu y l'Estatutu y la Llei d'Usu establecen la promoción del asturianu nos medios públicos», indicó Palacios, que consideró que la cadena pública actúa «como si fuera una cadena monollingüe en castellanu»; informó Europa Press.