El públicu va poder esfrutar de baldre'l próximu vienres, 27 de payares, del conciertu Seronda 4 na canal de Youtube de la sinfónica asturiana
26 nov 2020 . Actualizado a las 10:39 h.Les midíes adoptaes pol Gobiernu del Principáu d'Asturies pa contener la segunda fola del andanciu de COVID-19 lleva a la Orquesta Sinfónica del Principáu d'Asturies (OSPA) a suspender el conciertu programáu pal próximu 26 de payares n'Avilés y a celebralu n'Uviéu en streaming al otru día, obviamente ensin públicu y con toles garantíes de seguranza ya hixene afitaes poles autoridaes sanitaries. Con esti cambéu na forma d'ufiertar la so programación, la OSPA quier acompañar a los asturianos y asturianes nesta situación crítica al traviés de la música, faciendo que la so Temporada de Seronda llegue a tolos llares de manera gratuita. Amás, la OSPA abre una Fila 0 de la que la so recaldación va dir destinada al Bancu d'Alimentos.
El públicu va poder escuchar en directo'l programa Seronda 4 el próximu vienres a les 20:30 hores al traviés de la so canal de YouTube y tamién na páxina de Facebook y nel so perfil de Twiter.
Seronda 4 va ser dirixíu pol maestru David Reiland. El programa inclúi les siguientes obres: J. Haydn, Sinfonía nº 104, R. Strauss, Mondscheinmusik de Capriccio y R. Strauss, Cuatro últimes cantares.
La crisis sanitaria torgó la pasada primavera'l normal desenvolvimientu de la temporada d'abonu de la sinfónica asturiana. Pal so regresu a les sales de conciertu, la OSPA ufiertó programes a precios más baxos de los habituales de los conciertos d'abonu. Énte la crítica situación actual, la orquesta decidió ufiertar conciertos online gratuitos.
A pesar del calter gratuitu d'esti conciertu, la OSPA abre una Fila 0 pa recaldar dineru pal Bancu d'Alimentos y contribuyir asina al llabor qu'esta entidá ta desenvolviendo na nuesa comunidá. Les persones interesaes en facer un donativu al Bancu d'Alimentos pueden facelo al traviés de Bizum (códigu 00962) o facer una tresferencia bancaria (La Caixa ES 91 2100 4804 0622 0003 7090).
La OSPA va ingresar en cuenta l'importe de les entraes mercaes pola web. Pa les entraes adquiríes na taquilla del Teatru Campoamor, los interesaos van tener de rellenar un formulariu que puede descargase de la web de la orquesta (www.ospa.es) o recoyelu nel Auditoriu Príncipe Felipe dende esti mes. Esi formulariu, xunto a la copia de les entraes, va poder entregase nel Auditoriu d'Uviéu o per corréu electrónicu (infoospa.es). La OSPA va empezar a devolver esti importe a partir d'avientu.