El xurista Nicolás Bartolomé señala que la reforma del reglamentu de la Xunta Xeneral ye constitucional, anque la sentencía pue tardar años
26 nov 2020 . Actualizado a las 10:23 h.El xurista Nicolás Bartolomé afirmó esti miércoles que la reforma del reglamentu de la Xunta Xeneral ye «plenamente llegal y consitucional», anque la sentencia nesi sentíu «va tardar años».
En declaraciones a Europa Press, el xurista llionés y espertu en llexislación llingüística posicionóse asina depués de que'l Plenu del Tribunal Constitucional almitiera a trámite'l recursu d'inconstitucionalidá promovido por Vox contra la Reforma del Reglamentu de la Xunta Xeneral pa permitir l'usu del asturianu por diputaos y miembros del Gobiernu. Pa Vox, esto contradiz la llexislación al nun ser l'asturianu llingua oficial.
Según Bartolomé, la decisión del Tribunal Constitucional pue ser «complexa» porque los reglamentos de les asemblees llexislatives tienen un especial estatus xerárquicu nel ordenamientu xurídicu, polo que anuncia que la sentencia «va tardar años».
Una decisión final que pa él ye «una incógnita», porque tien que ponderase'l derechu al usu del asturianu de tola ciudadanía conforme a la Llei d'Usu de 1998 --que'l Constitucional avaló nel 2010--. Pa Barlomé, esto ye la clave de la cuestión, «y non si esta reforma del reglamentu ye una oficialidá de facto, que nun lo ye».
Asina, esplica que l'asturianu ya tien usos oficiales ampaos pola Constitución, l'Estatutu y la Llei d'Usu. «Pa min la reforma del Reglamentu de la Xunta Xeneral namás fai efectivu'l derechu al usu del asturianu nun ámbitu mui concretu sobre'l qu'había llaguna llegal, que la reforma impugnada despexa», indicó.
P'acabar, anque desconoz la lletra del recursu de Vox pa poder facer una valoración xurídica, diz que la reforma del Reglamentu de la Xunta Xeneral «ye plenamente llegal y constitucional».