Ente les midíes tán la puesta en marcha d'un Plan de Normalización Llingüística o la posibilidá de facer examenes y recibir conocimientos n'asturianu
02 dic 2020 . Actualizado a las 10:13 h.La Xunta pola Defensa de la Llingua Asturiana (XDLA) propunxo a los candidatos a rector Santiago García Granda y Ignacio Villaverde un décalogu de midíes pal usu del asturianu na Universidá d'Uviéu. Ente elles tán la puesta en marcha d'un Plan de Normalización Llingüística o la posibilidá de facer examenes y recibir conocimientos n'asturianu.
A lo llargo de les últimes selmanes, la XDLA reunióse colos candidatos al rectoráu de la Universidá d'Uviéu, que van disputar esi cargu nunes elecciones en feches próximes tovía ensin determinar por cuenta de la situación xenerada pol andanciu.
Nesos conceyos colos candidatos, apurrímos-yos un decálogu de compromisos normalizadores pa que lu incluyan nos sos programes electorales y se comprometan a llevalu alantre a lo llargo del so mandatu.
Ente les propuestes de la XDLA ta que la Universidá sía un promotor y dinamizador de la normalización llingüística, con un Plan de Normalización, un reglamentu internu d'usos llingüísticos o un Serviciu de Normalización.
Ayudes específiques pal usu del asturianu en tesis y trabayos d'investigación, la posibilidá de facer exámenes y escoyer docencia nesti idioma, una asignatura de Llingua Asturiana en tolos graos o un grau d'asturianu, completen les midíes; informó Europa Press.