Cristobo de Milio Carrín, de la Fundación Belenos, ta acabantes de asoleyar un artículo alredor d'una figura poco conocía, la Vieya
13 dic 2020 . Actualizado a las 14:49 h.Cristobo de Milio Carrín, de la Fundación Belenos, ta acabantes de asoleyar un artículu sobre mitoloxía ya creyencies populares del NW ibéricu, centráu sobretoo n’Asturies, na revista británica Folklore, una de les más nomaes nel so campu a nivel mundial. L’artículu, Winter Crones and Bread-Givers: The Northern Iberian Vieya, ye una pescuda alredor d’una figura mitolóxica poco conocía, la Vieya.
Una xiganta que apaez nel cumal de los montes, que remana el tiempu atmosféricu, especialmente les ñevaraes, ya que puede ser arrogante ya regalar bollos de pan a los neños. Una de les afirmaciones más llamaderes del artículu ye que esti personax salse de la categoría de xana o encantu, ya pue considerase una verdadera diosa.
L’artículu céntrase na convivencia ya’l solapamientu ente les creyencies populares ya la relixón oficial, nes interferencies ente dambes ya tamién, na crisis na cultura tradicional per aciu del despoblamientu rural ya del impautu de los medios de comunicación na tresmisión de la cultura oral.
La revista, amás, amuesa na so portada una semeya sacada n’Asturies, un teitu de Cangas del Narcea que fotografió Fritz Krüger en 1927. Seique ye la primer vegada que Folklore dedica la portada a Asturies nos sos 131 años d’hestoria.