El presupuestu de 2021 busca reforciar la normalización llingüística con activades y la meyora e implantación del traductor d'asturianu
15 dic 2020 . Actualizado a las 17:06 h.La conseyera de Cultura, Política Llingüística y Turismu, Berta Piñán, incidió na Xunta Xeneral nuna circunstancia qu'indicó «considera esencial y que poques veces se destaca y que ye'l calter tresversal que tien la política llingüística nesta llexislatura». Fíxolo enantes de dar cuenta de les cifres que'l presupuestu de la so Conseyería pa 2021 de la Dirección Xeneral de Política Llingüística.
«Nun se trata namás de que tenga presencia nes actividaes que programa o promueve esta Conseyería, sinón que ta presente n'acciones que ponen en marcha dende bien distintes conseyeríes, dende Educación a Salú, pasando por Presidencia o Medio Rural. Cada vez ye más frecuente qu'una campaña o dalguna actividá, como los nuestros circuitos culturales, faiga llegar el so mensaxe nes trés llingües de Asturies. Ye esi un camín ye'l que consideramos afayadizu y nel que queremos siguir insistiendo», manifestó Piñán.
Sobre les cifres, Berta Piñán esplicó la xuba moderada del programa de promoción del asturianu de la Dirección Xeneral de Política Llingüística, y qu'indicó que ta compensáu por eses otres inversiones tresversales.
Asina, el presupuestu d'esti programa pa 2021 ye de 2.077.271 euros, lo que supón una xuba del 9,1%. El capítulu de los gastos en bienes corrientes y servicios, xube nun 8,59 %, pasando de los 537.400 euros del exerciciu pasáu a los 583.541 previstos pa esti.
Esplicó la conseyera que nesti capítulu hai una redistribución del gastu, aumentando aquelles partíes que van permitir la meyora d'actuaciones qu'inciden de manera directa nes persones usuaries, como la meyora e implantación del traductor d'asturianu, o que se dean los primeros pasos pa la creación d'un traductor al gallego-asturianu.
La conseyera quixo destacar la medría de les dotaciones presupuestaries pa los Servicios de Normalización partíos pol mapa d'Asturies, con esta actividá búscase reforciar con una partida presupuestaria p'actividaes de normalización llingüística, que nun tuvieron nunca.
Recordó qu'amás se caltién el serviciu de normalización de la Universidá d'Uviéu y xube la partida presupuestaria pa la RTPA, que pasa de 70.000 a 100.000 euros. «Déxenme que puntualice que nun pretendemos que la programación n'asturianu na cadena pública limítese namás a esta inversión, pero creemos qu'esta partida permite actuaciones d'interés pa l'acción normalizadora de política llingüística, como se demostró nel presente exerciciu», indicó.
Patrimoniu cultural
Per otru llau, nes partíes destinaes al caltenimientu del patrimoniu cultural, Berta Piñán manifestó na Xunta qu'un aspectu capital en 2021 va ser el de les polítiques sobre l'horru y a la so xestión. Asina, en 2021 va concretase amás na creación, al traviés de la Fundación Cetemas, d'un almacén pa pieces procedentes d'horros y paneres desmontaos o arruinaos, que valgan pal so usu en rehabilitaciones d'otros d'estos elementos; collaborando cola Asociación d'Amigos del Horru, informa Europa Press.