Asturies aprueba la toponimia oficial del conceyu de Cabrales

La Voz

AGORA

Asiegu, aldea de Cabrales situada en el corazón de los Picos de Europa
Asiegu, aldea de Cabrales situada en el corazón de los Picos de Europa Alberto Morante

L'Executivu oficializó yá los nomes tradicionales de les poblaciones en 67 conceyos depués del vistu bonu de les corporaciones respectives

25 dic 2020 . Actualizado a las 10:56 h.

Na so reunión última, el Conseyu de Gobiernu del Principáu aprobó la toponimia oficial correspondiente al Conceyu de Cabrales, depués de que’l plenu del conceyu alcordare por unanimidá validar el dictame emitíu pola Xunta Asesora de Toponimia. A partir d’esta decisión, les alministraciones públiques han iguar nos mapes y planos oficiales y gradualmente nes señalizaciones les formes toponímiques afitaes nel decretu aprobáu’l miércoles.

Completar la revisión y oficialización de la toponimia tradicional d’Asturies va facilitar la so aplicación práctica poles alministraciones y los particulares. Amás, va dexar principiar el procedimientu que regule la recuperación de los nomes de los principales accidentes xeográficos (ríos, montes, playes, cabos, golfos, llagos, etc.). Esti últimu procesu va riquir un decretu regulatoriu nuevu.

La Xunta Asesora de Toponimia ocupóse, hasta la fecha, d’emitir dictame sobre los nomes tradicionales de les capitales, les parroquies rurales y los núcleos de población de los 78 conceyos. El Conseyu de Gobiernu yá aprobó la oficialización d’estos nomes tradicionales nel casu de 67 conceyos, depués de que les respectives corporaciones dieren el vistu bonu a los dictámenes correspondientes. La Conseyería de Cultura, Política Llingüística y Turismu quier acabar esti procesu nel 2022, en completando la oficialización de les poblaciones de los 11 conceyos restantes y en poniendo en marcha’l procesu pa la oficialización de los nomes de los 78 conceyos asturianos.