El Principáu defende que la PAC prime al llabrador que vive y trabaya nel mediu rural
AGORA
Asturies aspira a que'l modelu futuru refuercie'l trabayu de les esplotaciones familiares que contribúin a fixar población y desempeñen un llabor fundamental de caltenimientu ambiental
22 ene 2021 . Actualizado a las 13:44 h.El Gobiernu d'Asturies va defender que'l llabrador xenuinu, el profesional que vive y trabaya nel mediu rural, llogre más ayudes de la Política Agraria Común (PAC) nueva, que se va aplicar nel períodu 2023-2027.
Nesti sentíu'l Principáu aspira a que'l modelu futuru refuercie'l trabayu de les esplotaciones familiares, tradicionales nel norte d'España, que contribúin a fixar población nel territoriu y desempeñen un llabor fundamental de caltenimientu ambiental.
Asina lo informó esti vienres el conseyeru de Mediu Rural y Cohesión Territorial, Alejandro Calvo, en rueda de prensa, depués d'esplicar nel Conseyu de Gobiernu l'alcuerdu algamáu esta selmana col restu de comunidaes cantábriques (País Vascu, Galicia y Cantabria) pa que la PAC futura tenga en cuenta'l calter diferencial de l'actividá agrícola y ganadera que se practica nestes autonomíes, alliniada colos oxetivos europeos de sostenibilidá.
Según esplicó Calvo les cuatro comunidaes proponen que se defina la figura del llabrador xenuinu como'l profesional que percibe polo menos un 30% d'ingresos agrarios sobre los totales. Tamién pretenden que s'incluya nesti conceptu a les persones afiliaes a la Seguridá Social como trabayadores por cuenta propia nel sector, anque nun algame'l porcentaxe mentáu d'ingresos agrarios.
Sobre les ayudes directes, apuesten por superar los derechos históricos y avanzar hacia un tratamientu equitativu de les esplotaciones, adaptáu a la so realidá actual.
Sobre los pagos asociaos a los sectores de vacunu y lleche, consideren prioritariu cuntar, a lo menos, colos mesmos recursos qu'en 2014-2020, pola relevancia económica, social y ambiental d'estes producciones y les dificultaes específiques a les que s'enfrenten les esplotaciones nel área cantábrica.
Amás, defenden que'l máximu d'ayudes que percibe un mesmu beneficiariu (capping) sía 60.000 euros por esplotación, una midida que contribuyiría a disponer de recursos adicionales pa distribuyir ente les más pequenes.
El Gobiernu d'Asturies cree que toes estes propuestes constitúin la base pa consolidar un modelu de producción pa xenerar actividá económica y ameyorar la rentabilidá de los negocios nel mediu rural.
Asturies va tener cuasi 150 millones de fondos europeos anguaño, nel que se va tratar el diseñu del plan estratéxicu nuevu de la PAC futura. D'esta cantidá global, más de 64,7 millones van llegar al traviés del Fondu de Garantía Agrícola (Feaga) y 83,5 del Fondu Agrícola de Desarrollu Rural (Feader), informa Europa Press.