Amás, la previsión p'anguaño ye que suene namás música fecha n'Asturies o por artistes asturianos
29 ene 2021 . Actualizado a las 17:44 h.La Radio del Principáu d'Asturies (RPA) va cuntar a partir del llunes 1 de febreru con una identidá sonora nueva, con cabeceres, indicativos y sintoníes nueves de los principales programes de la cadena.
RPA va introducir tamién cambios na so programación, con espacios nuevos n'asturianu. Amás, la previsión p'anguaño ye que en RPA suene namás música asturiana, fecha n'Asturies o por artistes asturianos, y empezar a emitir informativos en fin de selmana El llunes día 1 de febreru, a partir de les 23.30 hores, RPA estrena Al son, una producción de 50 capítulos d'una hora de duración presentaos por Xune Elipe, que cada selmana va facer un percorríu polos movimientos y los estilos de la música asturiana dende l'añu 1974.
El xueves día 4 de febreru, ente les 23.00 y les 00.30 hores, va llegar La ciencia del cuentu. Un programa presentáu por Graciela Olivares y Pablo de María, del xéneru radioteatru, que recurre a la ficción y a l'actualidá p'averanos al mundu de la ciencia. 15 capítulos de temática variada y ficcionada que tienen la participación d'actores y actrices profesionales d'Asturies. Al son y La ciencia del cuentu foron los proyectos ganadores na convocatoria estraordinaria, Asturies crea Sinerxes, desenvuelta dende la Conseyería de la Cultura l'añu pasáu, pa promocionar la llingua y cultura asturiana y impulsar el sector audiovisual como parte de la industria de la rexón.
A partir del martes 9 de febreru, tolos martes y miércoles de 23.30 a 00.30 hores, el magacín 'Sentir Asturies' incorpórase a la programación selmanal de RPA. Un programa ellaboráu por xente mozo, n'asturianu y presentáu por Arantxa Margolles y Inaciu Galán, que va cuntar con collaboradores espertos nos sos ámbitos pa falar de l'actualidá asturiana, la ciencia, la cultura y l'ociu.
Estos son solo dalgunos de los estrenos. RPA va dir incorporando programes a lo llargo de les selmanes próximes, con una temporada nueva con más conteníos dedicaos a l'actualidá, más cercanos a Asturies y cola participación de los oyentes.
Va haber más presencia de los sos magacinos na cai y más minutos dedicaos a la cultura, llingua y música asturiana. Los debates d'actualidá, les tertulies y la collaboración colos sectores que más intensamente tán sufriendo la crisis del Covid-19, como'l sanitariu, la hostelería o la cultura ente otros, van ser prioritarios na cadena.