La aldea global y los faltosos

María Luz Pontón

AGORA

La actriz y cantante, Victoria Abril
La actriz y cantante, Victoria Abril Óscar Cañas | europa press

03 mar 2021 . Actualizado a las 09:34 h.

Un 70% de les enfermedaes emerxentes y les andancies conocíes, como la COVID-19, son zoonótiques, ye a dicise, causaes polos microbios d’orixe animal. Hai 1,7 millones de virus entá «non descubiertos» que viven en mamíferos y aves, y unos 850.000 podríen tener la capacidá d’infestar a los seres humanos. Kate Jones, catedrática d’ecoloxía y biodiversidá del University College de Londres alvierte qu’hai una gran coincidencia ente les enfermedaes infeicioses emerxentes y la destrucción de la diversidá biolóxica por culpa de les actividaes humanes. Per otru llau, Peter Daszak, un espertu n’ecoloxía de les enfermedaes, camienta que’l cambéu d’usos de la tierra y l’aumentu de la vixilancia, costaríen ente 40.000 y 50.000 millones de dólares al añu, muncho menos de lo que cuesta una andancia. Darréu d’ello, el ser humanu pue salvase a sí mesmu, con midíes basaes na reducción del comerciu de vida silvestre y abandonando les actividaes humanes qu’impulsen el cambiu climáticu y la pérdiga de biodiversidá. Nin l’andancia ye’l castigu nin los esperteyos son los culpables, la naturaleza debe tar mui farta énte’l comportamiento destructivu de la especie humana. Por esti motivu nun sorprende que Jane Goodall diga que «los humanos, como especie, vamos p’atrás». Nin que científicos célebres como Peter Singer, Stuart J. Russell o Stephen Hawking coincidieren nuna idea fundamental: el ser humanu ye’l mayor riesgu pa sí mesmu. El cosmólogu y científicu espacial Martin Rees va más allá: «L’aldea global tendrá los sos faltosos d’aldea y estos van tener algame global».

Hai dellos faltosos que’aprovechen un minutu de gloria pa dicir babayada tres babayada. Y como la inorancia ye atrevida, el cantante Miguel Bosé, unu de los pioneros n’opinar ensin tener idea de lo que fala, atrevióse a dicir esti xunu que Pedro Sánchez yera «cómpliz» del plan «macabru y supremacista», que la Covid-19 yera «la gran mentira de los gobiernos» y que Bill Gates taba detrás d’un plan pa controlar a la población al traviés de vacunes masives. Pero tamién hai faltoses d’aldea, asina que nun nos choca que’l doctor César Carballo llamare a Victoria Abril «analfabeta científica» depués de dicir que les mascarielles provoquen cáncer y que na presentación de los Premios Feroz se despachare a gustu con un incendiariu discursu negacionista, «esperimentos ensin probar que nos meten rapidito y que nun tán funcionando».

Otros personaxes como Alaska o Mario Vaquerizo, como dicen que defenden la llibertá d’espresión, en cuenta reprochar l’actitú de Miguel Bosé y Victoria Abril, llámenlos valientes por atrevese a dicir babayaes.Ye verdá que la llibertá d’espresión ye la piedra maestra non solo de la democracia sinón del progresu, pero pocu progresu paez falar por falar, ensin informate enantes, falar por aparentar, por llamar l’atención, por negar lo evidente, contradiciendo dalgo contrastao pola comunidá científica, despreciando’l peligru que representen les palabres qu’ayuden a esparder el virus de la inorancia. Los negacionistes nieguen que les vacunes son unu de los más grandes avances. Nieguen que la inmunización evita ente dos y tres millones de muertes en tol mundu. Nieguen que gracies a les vacunes desanicióse la viruela y controlóse la poliomelitis, el tétanos o’l sarampión y agora nieguen que’l desarrollu de les vacunes contra la Covid en tan pocu tiempu foi una auténtica fazaña. Nieguen que tenemos que tar mui agradecíos a la esperiencia científica acumulada pol llogru ensin precedentes que ta salvando munches vides. El negacionismu ye esmolecedor ya alarmante dafechu en temes como l’Holocaustu, el cambiu climáticu, l’andancia… Yo niego lo qu’afirmen los negacionistes y afirmo que signifiquen un auténticu peligru porque les sos consignes son tan simples como destructives.