La Cámara refugó la propuesta del grupu pa encamentar al Principáu a promover la institucionalización del Archivu de la Tradición Oral d'Asturies de Jesús Suárez
24 mar 2021 . Actualizado a las 17:23 h.La Cámara refugó esti miércoles la propuesta del PP pa encamentar al Principáu a promover la institucionalización del Archivu de la Tradición Oral d'Asturies de Jesús Suárez y ello a pesar de que'l diputáu, Álvaro Queipo, reclamó «encarecidamente» l'apoyu a esta iniciativa. Namás Ciudadanos y Vox dieron el so votu a favor, mentes que PSOE votó en contra y el restu de grupos, Podemos, IX y Foru, astuviéronse.
Queipo destacó que'l so grupu «ye defensor d'un asturianu en llibertá, como esti que sal de los mesmos raigaños de la sociedá y qu'ente toos podemos ayudar a protexer y caltener».
Defende'l PP que con esta iniciativa busca garantizar l'accesibilidá de los sos fondos documentales nel momentu presente y promoviendo la so tresmisión a les xeneraciones futures «al traviés del compromisu y la collaboración institucional de l'Alministración del Principáu d'Asturies».
La PNL destaca la importancia d'esti Archivu pa salvaguardar el patrimoniu inmaterial asturianu con «más de mil hores de grabaciones n'audiu y vídeu, amás d'una estensa colección de semeyes de gran valor documental».
Tamién destaca'l PP la importancia del 'Atles Sonoru de la Llingua Asturiana' al ser «una obra magna sobre la llingua asturiana» y recoyer dixitalmente «les distintes modalidaes llingüístiques d'Asturies: oriental, central, occidental y gallego-asturianu».
Nesi sentíu, indicaron que «pola falta d'apoyu institucional», existe la posibilidá de que treslladen esti archivu a la Universidá Autónoma de México «lo que sería una perda irreparable pa los asturianos, que nun podríamos nin consultar toa esa obra».
«Nengún partíu políticu nin nengún Gobiernu que se declare comprometíu cola protección y divulgación de la llingua y la cultura asturiana tendría qu'aceptar esa perda de competencies o mostrase indiferente énte esta posibilidá», indicaron, p'añadir qu'esti «supondría cayer nuna contradicción vultable colos sos propios principios y obligaciones».
La socialista Noelia Macía --el so grupu refugó la iniciativa del PP--, indicó que'l Gobiernu ye consciente de la importancia de la colección de Jesús Suárez, que nuna parte importante publicó y editó'l Principáu.
Nesti sentíu, indicó qu'esi archivu ye mui valoratible, pero tamién lo son otros munchos, y consciente d'ello'l Gobiernu yá creó la Mesa Sectorial de la Cultura Tradicional y Popular, y dientro d'ella un grupu de trabayu dedicáu a los Archivos onde pretende «una solución global» pa tolos archivos existentes n'Asturies
El diputáu de Ciudadanos, Armando Fernández Bartolomé, mostró l'apoyu del so grupu a la iniciativa del PP qu'al so xuiciu «ye bien sólida» porque dexa abierta la posibilidá de que'l Gobiernu asturianu lidere la protección d'esti patrimoniu.
Dende Podemos, Rafael Palacios, felicitó la puesta sobre la mesa d'esta iniciativa que se suma a la protección del patrimoniu d'Asturies, pero optó por astenese pa pidir al PP y al restu de grupos que s'ellabore una iniciativa conxunta que supere y complete esta. Y ye que según Palacios hai otros archivos, trabayos y estudios que tamién tendríen que formar parte d'esti Archivu. Tamién IX y Foro optaron por astenese na votación.
El diputáu de Foru, Adrián Pumares, dixo que ta «en gran parte d'alcuerdu» cola midida, anque consideró «ta un poco coxa porque hai otros archivos que tienen que tenese en cuenta».
Dende Vox, Ignacio Blanco, defendió una enmienda a la propuesta --que nun foi aceptada pol PP-- pa que «nun exista nenguna barrera llingüística» p'acceder a esos documentos.
Blanco destacó que'l so grupu cree na «historia real» y non na «historia inventada» y considera qu'esti archivu ataca esa idea de «pintar Asturies de namás un color»; informó Europa Press.