Villaverde diz que la identidá gráfica n'asturianu nun ta recoyida nel manual de la Universidá

La Voz

AGORA

Acto de toma de posesión del rector de la Universidad de Oviedo, Ignacio Villaverde
Acto de toma de posesión del rector de la Universidad de Oviedo, Ignacio Villaverde

El rector afirmó que caltuvo una xunta cola Academia de la Llingua de cara a abrir víes nueves de collaboración

30 mar 2021 . Actualizado a las 12:59 h.

El rector de la Universidá d'Uviéu, Ignacio Villaverde, esplicó que la identidá gráfica de la Universidá d'Uviéu yá nun inclúi'l nome de la institución n'asturianu porque nun ta recoyíu nel manual d'identidá corporativa, aprobáu en 2013 pol Conseyu de Gobiernu de la entidá académica y que «ye'l que tien que rexir los criterios».

Nesi sentíu, señaló que si «daquién» lleva a Conseyu de Gobiernu un cambiu va tar «encantáu de debatilo», pero «hai que sometelo al órganu que tien que decidir». «Nun pue ser una decisión unillateral d'un equipu rectoral», indicó en referencia al equipu anterior, encabezáu por Santiago García Granda.

El rector esplicólo asina esti martes n'Avilés en declaraciones a los medios depués de caltener una xunta cola alcaldesa de la ciudá, Mariví Monteserín.

Con too, Villaverde esplicó que dende l'equipu rectoral van siguir tomando midíes de cara a normalizar l'asturianu na Universidá y afirmó que nestos momentos tán trabayando nuna serie de plantiyes de la documentación y la imaxe corporativa n'asturianu en cumplimientu de la Llei d'Usu de 1998.

«El criteriu ye siguir el mesmu del Principáu, ye lo que creo que como institución pública tenemos que respetar y siguir apoyando y fomentando l'aspectu académicu», indicó Villaverde, p'añadir que yá caltuvo una xunta cola Academia de la Llingua de cara a abrir víes nueves de collaboración «que puen ser bien interesantes pa siguir curiando dalgo que forma parte de la nuestra cultura y identidá, como ye la nuestra llingua»; informó Europa Press.