Bones noticies en rellación a la normalidá constitucional de les llingües

AGORA

Testos normativos de llingua asturiana.
Testos normativos de llingua asturiana. ep

01 abr 2021 . Actualizado a las 05:00 h.

El mes de marzu foi un mes especialmente bonu pa la defensa de la pluralidá llingüística d’España y, como non, d’Asturies. A mediaos de mes diose’l preste nel Congresu de los Diputaos a 3 puntos de la Proposición Non de Llei (PNL) «en defensa de la realidá plurillingüe del Estáu español». La decisiva participación de los representantes socialistes dexó dar un pasu mui importante en rellación a la normalidá constitucional respeuto a les llingües. Nun pue negase que, anque  l’avance ye simbólicu, na cuestión de derechos supón un llogru importante. Hai que destacar l’apartáu onde se pide «Impulsar y sofitar reformes estatutaries pa la oficialidá de llingües propies qu’entá nun son oficiales nuna parte o na so totalidá del territoriu onde se falen». N’otru apartáu dizse que va «permitir l’usu alministrativu de les distintes llingües ente territorios del mesmu espaciu llingüísticu, dientro y fuera de les fronteres alministratives, ensin barreres y firmando alcuerdos pa la receición recíproca de medios de comunicación dientro d’esos espacios llingüísticos». Pídese tamién el «respetu real, basáu en derechos y deberes y na actuación comprometida de tolos poderes del Estáu pa coles llingües diferentes al castellanu». La conseyera de Cultura, Política Llingüística y Turismu, Berta Piñán da la bienvenida a los apoyos que vengan d’otres alministraciones «pa reafirmar el compromisu eleutoral del PSOE».

A lo cabero’l mes vieno otra bona noticia: el Tribunal Constitucional desestimó'l recursu d'inconstitucionalidá interpuestu por VOX que pretendía censurar l'usu del asturianu na Xunta Xeneral del Principáu d'Asturies. Esta sentencia supón un revés mui importante pa la estratexa y les pretensiones de la estrema derecha. Nun informe estensu dizse que la llingua asturiana pue usase tanto polos diputaos nel exerciciu de les sos funciones parllamentaries, como polos miembros del Conseyu de Gobiernu, los cargos y emplegaos, o cualesquier persona que compareza énte la Cámara autonómica. El testu esclaria que la falta d'oficialidá nun escluye la posibilidá de «tutelar esta realidá llingüística» nel Parllamentu.

La sentencia remarca que la falta d’oficialidá nun escluye la posibilidá de tutelar una realidá llingüística con midíes de proteición y promoción, como ye la reconocencia del usu de la llingua propia énte l’órganu de representación de la ciudadanía, la Xunta Xeneral del Principáu d’Asturies, «foru de debate y participación onde ye especialmente afayadizo que se garantice y visibilice aquella realidá llingüística plural». D’esta miente, protéxese y ampárase al asturianu, yá que los maxistraos entienden que “nun hai dulda de que resulten d’aplicación les disposiciones de la Carta Europea de les Llingües Rexonales o Minoritaries». Esti pronunciamientu históricu nun lo ye solo porque corta dafechu’l propósitu de censurar y relegar la nuestra pluralidá llingüística per parte de la formación d'estrema derecha n'Asturies, sinón tamién porque per primer vegada esplicítase l'amparu constitucional a la protección d'un patrimoniu inmaterial asturianu como son les llingües propies, al empar de la condición qu'adquieren.

La conseyera y vocera del Gobiernu, Melania Álvarez García, espera que la derecha llea la sentencia del Constitucional y dexe «de facer el ridículu y de convertir l’usu del asturianu nun elementu de discutiniu políticu». Con esti pronunciamientu debería acabase coles pretensiones de la formación ultraderechista de poner torgues nel usu de la llingua asturiana na Xunta Xeneral, pero nun ye asina. Nun tendría que chocanos que la ultraderecha siga na mesma postura negacionista, yá que ta avezada a emplegar argumentos falsos al estilu de Donald Trump, como cuando punxo nun twit que l’asturianu yera «una llingua artificial». El casu ye que’l presidente de Vox n'Asturies y voceru parllamentariu, Ignacio Blanco, camuda al so gustu la sentencia del Constitucional a la que califica de «éxitu». Ye más, empéñase en dicir que «dexa too como taba porque evita l’usu indiscrimináu del asturianu», dalgo que ye falso dafechu. Pero da un pasu más nesti afán por restorcer la realidá hasta límites insospechaos, yá que diz que’l «Tribunal Constitucional nun actúa de forma oxetiva, sinón por motivos políticos». Pa ello, básase en que la sentencia sobre l'usu del asturianu na Xunta Xeneral fízose primero que los sos recursos sobre l'estáu d'alarma. L’únicu propósitu d’afirmación tala ye l’engañu, yá qu’esta demanda correspuende a un fechu qu’entamó al principiu de la llexislatura; enantes de qu’apaeciere en Wuhan, polo tanto, el primer casu de Coronavirus.

Esperamos que, pol bien de la salú democrática, esta deriva negacionista que va medrando en VOX nun seya tamién la tónica dominante del Partío Popular. Ye más, el presidente d’Asturies, Adrián Barbón, espera, como esperamos la mayoría de los asturianos y asturianes, qu’esti pronunciamientu faiga al PP camudar d'actitú respeuto al «siguidismu» cola estrema derecha.