Ocalitos non, gracies

AGORA

Imagen de una plantación quemada de eucaliptos
Imagen de una plantación quemada de eucaliptos ÁLVARO BALLESTEROS

05 abr 2021 . Actualizado a las 05:00 h.

Va años que nel país vecín, Galicia, la superficie forestal tien un nome: plantaciones d'ocalitos. Pero ye que fai yá meses que la Xunta de Galicia declaró públicamente que los ocalitos yeren una especie autóctona, non una invasora, y que nun había viesques propies en Galicia. Asina, ensin prexuicios, falen d'una especie (Eucalyptus globulus) que vien d'Australia y sustitúi al hábitat ñatural centenariu. 

Agora nagüen por llantar otra especie d'ocalitu más pelligrosa (Eucalyptus nitens), más resistente a les temperatures baxes polo que colonicen a más altor los montes, pa facer ropa de fibra vexetal col usu de la so viscosa. La Xunta de Galicia, ENCE, INDITEX, son los nomes que perpetúen les plantaciones d'alta densidá feches na dictadura, esaniciando la viesca autóctona por cultivos de xorrecimientu rápidu. Y too ello promovíu colos fondos europeos pa la reconsturcción posvid.

La biodiversidá gallega alcuéntrase mui amenazada («De trés millones d'hectárees del territoriu,dos tercios ye madera», dixo'l presidente gallegu) y la posibilidá d'incendios pola celulosa agrávase abondo. Ye la xestión a curtiu plazu qu'arreya males consecuencies. La prevención pasa poles especies autóctones, curiar el paisaxe, y les cadarmes de les mases forestales. Un modelu de monte más diversu y prósimu a la ñatura.

Pero yá tán en marcha los proyeutos dINDITEX pa producir ropa cola etiqueta «verde» y «sostenible» a partir de la nueva especie d'ocalitu. El Plan Forestal de Galicia ye estafa a gran escala que tien los raigones na uniformización del masa forestal gallega surdida de los planes de producción maderera del franquismu.

La sociedá rural gallega nun tien la capacidá d'organizase, nin d'enfrentase a esta amenaza, nin a la xestión braeramente sostenible del to espaciu, anubierta colos porgüeyos fáciles. Endólcase nuna inercia de décades difícil de torgar.

Mientres, Portugal torgó llantar los nuevos ocalitales y Asturies caltién una política forestal menos agresiva col mediu ñatural. Esperemos que la barbarie de consumismu curtiuplacista que desanicia la natura nun trespase la llende del Eo. 

Como novedá, en febreru, la Xunta presentó'l plan de diversificación del monte gallegu y la suspensión temporal de la plantación d'ocalitos onde nun se tenga plantao esta especie, nun plazu de venti años. D'este miente, los ecoloxistes gallegos desixen un catálogu de sanciones pa facer efeutiva la moratoria del ocalitu. Amás, planteguen l'amenorgamientu de la so superficie. Tamién alerten del xorrecimientu na plantación d'ocalitos pa llibrar la moratoria qu'entrará en vigor en xunu.

Asina, tamién solicítase la moratoria de plantaciones d'ocalitos n'Asturies dende cuasi una decena de grupos ambientales del nuesu país.

Argumenten qu'equí yá se superen les hactárees permitíes. Que los monocultivos d'ocalitos incrementen el riesgu de fueos, amenorguen la biodiversidá y la bayura del paisaxe y frayen la multifuncionalidá del monte.