L'ALLA diz que la propuesta del PSOE sobre l'asturianu na Xunta Xeneral «retuerce» la sentencia del Constitucional

La Voz

AGORA

Academia de la Llingua
Academia de la Llingua

La petición de repetir les intervenciones en castellanu «nun tien precedente nos otros parllamentos autonómicos con llingua propia»

15 abr 2021 . Actualizado a las 10:44 h.

L'Academia de la Llingua Asturiana (ALLA) afirmó esti xueves que la propuesta del PSOE pal usu del asturianu na Xunta Xeneral vulnera l'espíritu del reglamentu del parllamentu y «retuerce» la sentencia del Tribunal Constitucional.

Los grupos parllamentarios trataron esti miércoles, en Xunta de Portavoces, una propuesta del PSOE pal usu del asturianu y el castellanu na Xunta Xeneral. La fórmula pretende dar respuesta a la sentencia del Tribunal Constitucional sobre l'usu del asturianu nel parllamentu autonómicu y evitar la traducción simultánea.

Asina, nel casu de qu'un diputáu diga nun entender una intervención n'asturianu, va tener que repetila en castellanu. La intervención quedaría recoyida de manera billingüe --asturianu y castellanu-- nes publicaciones de la Cámara. Los servicios xurídicos de la Xunta tienen que dar forma a esta propuesta, pa depués treslladala al restu de grupos y votala.

Sicasí, pa l'ALLA esta propuesta «camuda lo qu'habría ser un éxitu pa la llingua nun fracasu na so xestión y aplicación». «Lo que se propón pa la Xunta Xeneral nun tien precedente nos otros parllamentos autonómicos con llingua propia», indicaron al traviés de nota de prensa.

Pa la insitución, la propuesta «va contra la noción científica d'alta intercomprensión ente l'asturianu y el castellanu y produz un estrañamientu social de la llingua asturiana, inxustificáu dafechu, incluso ente les persones que nun la falen», polo que sería «una escenificación inesplicable que va siguir comprometiendo la llibertá y la dignidá de les persones» que quieran intervenir n'asturianu y en gallego-asturianu na Xunta Xeneral.

Pa l'ALLA, esta propuesta «vulnera l'espíritu de la norma aprobada pola propia Xunta Xeneral y retuerce la sentencia del Tribunal Constitucional, camudando lo qu'habría ser un éxitu pa la llingua nun fracasu na so xestión y aplicación».

CERTIFICAOS D'ASTURIANU

Per otru llau, l'ALLA calificó de «inconsistencia» la falta de reconocimientu por Educación de les certificaciones oficiales d'idiomes qu'entraron en funcionamientu pal asturianu l'añu pasáu, polo qu'apremió a que los departamentos implicaos «busquen y afiten una solución definitiva pa nun cayer na incoherencia de tar oficializando unos títulos axustaos al Marcu Européu de les Llingües pa depués nun los reconocer nos rexistros del propiu Principáu».

Énte esto, la institución destacó la so «preocupación» pola situación y pidió abrir el procesu de reforma del Estatutu pa declarar la oficialidá de la llingua asturiana «pa solucionar tolos problemes que, con cotidianeidá, amenacen los derechos llingüísticos».