«Nun insulte a la ciudadanía qu'utiliza l'asturianu y que tamién tien derechos», respuende Piñán a Leal
AGORA
El diputau dixo que subvencionar la edición de lliteratura n'asturianu suponía crear «un club de subsidiarios»
29 abr 2021 . Actualizado a las 12:49 h.La conseyera de Cultura, Política Llingüística y Turismu, Berta Piñán, reclamó al diputáu Pedro Leal (Foru) que «nun faiga de menos y falte d'una manera soterrada a la ciudadanía qu'utiliza l'asturianu, que tamién tien derechos».
La conseyera respondió asina depués de que Leal afirmara que subvencionar la edición de lliteratura n'asturianu suponía crear «un club de subsidiarios» y «niales de manteníos».
Leal preguntó a Piñán na Comisión de Cultura de la Xunta Xeneral sobre la planificación prevista nel presente exerciciu 2021 pa preparar la efeméride Cuadonga 2022 «con antelación y medios abondo».
Nesi sentíu, el diputáu criticó que l'aniversariu de la batalla de Cuadonga, orixe del Reinu d'Asturies, nun tenga «planificación nin presupuestu» cuando, señaló, podría ser un reclamu internacional pa la rexón.
«La cultura nun se limita a la oficialidá nin a repartir subvenciones pa publicar ediciones n'asturianu nin promover xardinos de la memoria histórica», indicó Leal, qu'afirmó, qu'esto «nun ye crear cultura, sinón crear un club de subsidiarios».
«Subvencionar llibros que nun se lleen nun ye promocionar cultura sinón crear niales de manteníos», señaló'l diputáu enseñando publicaciones n'asturianu editaes pol Principáu coincidiendo cola Selmana de les Lletres.
La conseyera de Cultura, escritora reconocida n'asturianu, reclamó a Leal non «trivializar» el conceptu de cultura y que «nun faiga de menos y falte d'una manera soterrada a la ciudadanía qu'utiliza l'asturianu, que tamién tien derechos».
1.300 ANIVERSARIU DE CUADONGA
No que tien que ver col aniversariu de la batalla de Cuadonga, la conseyera indicó que la so planificación ta teniendo «una atención preferente» de cara a una «programación ambiciosa qu'implique a distintes instituciones y entidaes».
Asina, detalló que se tán preparando les publicaciones de los alcuentros científicos de 2018 --«qu'imaxino qu'estes nun-y paecen un gastu», señaló Piñán a Leal--, y tán preparando'l 'Camín de los Santuarios'.
La Conseyería, en collaboración colos Conceyos, ta definiendo ta ruta que va xunir Uviéu con Cuadonga y que pretenden que llegue hasta Llébana, amás de sumase dientro de los 'caminos de Carlomagno' a nivel européu.
La programación ta ellaborándose, esplicó Piñán, en collaboración col Conceyu de Cangues d'Onís y el RIDEA, amás de colos equipamientos culturales dependientes del Principáu, y van incluyir actividaes culturales y festives que se van dar a conocer na segunda metá del añu.
«Esta importante celebración tien que valir pa que 2022 sía un gran añu d'actividá nel Principáu gracies tamién a la celebración estendida del Xacobéu», sentenció Piñán, según informó Europa Press.