Barbón pide'l PP que «abandone postulaos negacionistes» cola oficialidá

El presidente quier principiar anguaño una reforma del Estatutu «más amplia que la llingüística»


El presidente del Gobiernu del Principáu d'Asturies, Adrián Barbón, señaló esti miércoles en respuesta a Podemos que quier principiar nos últimos meses d'anguaño una reforma del Estatutu d'Autonomía más allá de la oficialidá del asturianu.

El xefe del Executivu autonómicu fixó'l marcu temporal pal empiece del debate sobre la reforma estatutaria nel control del andanciu de covid en base al procesu d'inmunización del pueblu asturianu.

D'esta manera respondió al portavoz de Podemos, Daniel Ripa, qu'apuró al Gobiernu del Principáu a impulsar la reforma y apostar pola oficialidá énte un «peligru de involución» evidenciado, diz, col resultáu electoral de Madrid, y los «ataques de la ultraderecha» que se ven pol usu del asturianu na Xunta Xeneral.

Ripa, que faló n'asturianu, afirmó qu'esta va ser la llexislatura «de la oficialidá» y namás falta saber el cuándo, porque tienen respaldu de 27 diputaos y cree que dalgún otru partíu «va sumase con gustu». D'esta manera, encamienta al Principáu a entamar el procesu pa recoyer nel Estatutu d'Autonomía la «pluralidá llinguística que s'asume con normalidá» na sociedá asturiana.

Igualmente, considera que la reforma tien qu'aprovechase tamién pa consolidar derechos sociales y meyores d'organización de la comunidá autónoma. «Queden 22 meses», dixo, alvirtiendo de la lentitú de los trámites qu'implica reformar tanto na Xunta Xeneral como nel Congresu de los Diputaos.

Nesi sentíu, Barbón destacó que nos últimos meses de 2021 van poder tar en situación de principiar una reforma «más amplia que la llingüística», y que trate tamién otros aspectos, como dellos preseos xurídicos que la crisis sanitaria evidenció necesarios.

Igualmente, el presidente apelló al «consensu tresversal» que, diz, precisa esta xera «dende'l mesmu momentu en que se precisen 27 diputaos» de los 45 que componen la Xunta Xeneral, yá non namás pa incluyir la oficialidá nel Estatutu sinón pa l'aprobación de la llei que desenvuelva'l modelu d'oficialidá.

Amás, Barbón repitió la so defensa d'un modelu de oficialidá afayáu «a la realidá sociollingüística d'Asturies» y que «nun tien qu'asemeyase a nengún otru n'España». «Una oficialidá amable, a l'asturiana y comprensiva», dixo, pa dir ganando cada vez mas apoyu ciudadanu.

Coles mesmes, el presidente pidió a Podemos y otres formaciones qu'apoyen la oficialidá a «fuxir de la provocación» d'otros partíos. «Énte los que provoquen lo meyor ye siguir trabayando», dixo Barbón, qu'empleó l'asturianu y el gallego-asturianu na so intervención.

Adrián Barbón refugó pidir a Vox «que vote la oficialidá», pero sí pidió al PP que «abandone postulaos negacionistes» y «asonsañe» al PP de Galicia «nel so arguyu» sobre'l «patrimoniu cultural» que supón la oficialidá de la llingua propia.

Con too, el presidente asturianu aspira a encarar la reforma estatutaria con una visión amplia y consensu pa trabayar nun modelu propiu, evitando provocaciones pa que'l procesu acabe con «éxitu». «Cuarenta añu depués yá toca la reforma del Estatutu», dixo; informó Europa Press.

Conoce nuestra newsletter

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Comentarios

Barbón pide'l PP que «abandone postulaos negacionistes» cola oficialidá

Cola ayuda de