Los participantes na concentración qu'entamó la Xunta pola Defensa de la Llingua llevantaron banderes cola palabra «oficialidá» y un corazón de colores
08 may 2021 . Actualizado a las 13:17 h.Cientos de persones participaron esti sábadu nuna concentración n'Uviéu qu'entamó la Xunta pola Defensa de la Llingua Asturiana (XDLA) pa reclamar a los grupos parllamentarios que tengan «responsabilidá histórica» pa sacar alantre una reforma del Estatutu que recueya la oficialidá del asturianu y del gallego-asturianu «ensin más retraos y tamién ensin recortes y ensin apellíos».
La concentración, celebrada na Plaza la Catedral y que guardó toles midíes de seguranza, consistió en cientos de persones que llevantaron banderes cola palabra «oficialidá» y un corazón de colores. Les mesmes, según indicaron dende la XDLA, van viaxar agora per toa Asturies «como una insignia de dignidá hasta que nun veamos reconocíos los nuestros derechos». La organización quixo tamién simbolizar coles banderes el trabayu pola oficialidá de xeneraciones anteriores y de cómo pasar el testigu «de l'ayalga cultural que suponen les dos llingües propies d'Asturies y asumir con puxu la responsabilidá de conservales pa otres xeneraciones que van venir».
Nesi sentíu, nel manifiestu que punxo puntu final a la concentración, la presidenta de la XDLA, María Xosé Martínez, afirmó que «nun ye serio» que'l presidente asturianu, Adrián Barbón, tea poniendo de plazu p'abrir la reforma la fin de la crisis sanitaria. «La reforma del estatutu pa declarar la oficialidá yá se tenía qu'entamar en sabiendo qu'había una discriminación, una falta de derechos d'una parte de la población d'Asturies. Nun ye ético saber d'esa inxusticia y nun poner tolos medios que se tienen, tol poder, tola maquinaria llexislativa a furrular p'acabar con ello», indicó Martínez.
Asina, reclamó abrir yá'l procesu pa sacar una alantre «una oficialidá ensin más retrasos, y tamién ensin recortes, y ensin apellíos, como manda la Constitución, como tienen n'otres comunidaes autónomes con una llingua propia diferente del castellanu». La XDLA indicó que nestos momentos los diputaos a favor de la oficialidá yá sumen los 27 votos necesarios p'aprobar la reforma, polo que-yos pidió que «dexen de llau les estratexes partidaries y qu'encaren col altor qu'amerita la responsabilidá histórica que tienen». «Nun hai sides, nun hai nada qu'esperar. Ye posible facelo yá, nesti periodu de sesiones», afirmó, según informa Europa Press.