Cultura dexa l'asturianu ensin subvenciones pa la traducción de llibros

La XDLA denuncia la «doble cara» del Ministeriu qu'editó, pela primer vez, el cartel col que celebra'l Día Internacional del Llibru na llingua asturiana


La Xunta pola Defensa de la Llingua Asturiana (XDLA) acusó al Ministeriu de Cultura y Deporte de tener una «doble cara» col asturianu, al convocar una llinia de subvenciones pa la traducción de llibros ente llingües del Estáu y dexar fuera al asturianu por nun ser llingua oficial.

La convocatoria recueye qu'a estes ayudes, en réxime de concurrencia competitiva, namás se puen presentar obres nes llingües oficiales del Estáu y, amás, esplicita que se consideren idiomes oficiales del Estáu los que tean recoyíos con tal denominación nos sos Estatututos d'Autonomía, esplicó la XDLA al traviés de nota de prensa.

Pa la organización, esti apunte «tien la intención clara de dexar fuera al asturianu y a tola so producción cultural, amás d'a los sos creadores, que pal Ministeriu paez que nun tienen los mesmos derechos que los qu'usen el castellanu, catalán, gallegu o vascu».

Amás, indiquen, muestra la «doble cara» del Ministeriu de Cultura del Gobiernu d'España, qu'editó, pela primer vez, el cartel col que celebra'l Día Internacional del Llibru, amás d'en castellanu y nes llingües oficiales, n'asturianu y aragonés.

«Esti xestu pequeñu supón un fechu históricu, porque l'Estáu ta reconociendo, pela primer vez, l'asturianu ente les llingües d'España. Sicasí, a la hora de la verdá, vuelve a dexar de llau a los creadores y a los llectores asturianos, mostrando que pal Ministeriu ye un idioma de segunda, una curiosidá exótica pa 'cartelinos', pero non pa incluyila dientro de les sos polítiques culturales», sentenciaron, según informó Europa Press.

Conoce nuestra newsletter

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Comentarios

Cultura dexa l'asturianu ensin subvenciones pa la traducción de llibros

Cola ayuda de