Adrián Barbón: «La oficialidá del asturianu va facese de manera consensuada y alcordada»

El presidente del Principáu d'Asturies, el socialista Adrián Barbón, aseguró esti miércoles que la oficialidá del asturianu va ser productu «del diálogu», y destacó que se va facer «de manera consensuada y alcordada».

Barbón defendió esta postura nuna respuesta a la portavoz de Ciudadanos, Susana Fernández, esplicando que pa llegar a esti puntu ye necesario'l cambiu del Estatutu d'Autonomía, que cumple 40 años, la so aprobación nel Congresu de los Diputaos y la posterior ellaboración d'una «Llei d'oficialidá amable» na rexón.

Énte les crítiques de Fernández pol calendariu planteáu, el presidente negó que la normalización de la llingua vaiga acabar con «conceptos o realidaes», y criticó'l «complexu históricu» de reconocer la realidá llingüística asturiana.

Per otru llau, criticó la postura de Ciudadanos, asegurando que ye «inxusto» que traten de «amenorgar» la reforma del estatutu «al tema de la oficialidá». «Hai que llegar a un alcuerdu bien ceo pa llevalo al Congresu», dixo.

La portavoz de Ciudadanos, per otru llau, destacó que, anque'l PSOE tenga mayoría parllamentaria pa sacar alantre la oficialidá, «nun tienen» la mayoría social, porque ye un asuntu que «interesa muncho a pocos y mui poco a munchos». Nesti sentíu, pidió que se faiga una consulta ciudadana sobre la oficialidá.

Pidió al presidente qu'esplique en qué consiste la «oficialidá amable» y señaló que'l so partíu defende «Asturies y la so cultura», tamién l'asturianu. «Queremos promovelo, non imponelo», dixo, pa depués criticar que'l PSOE nun foi a promocionar la Llei d'usu, informa Europa Press.

Sobre la reforma del Estatutu d'Autonomía, la portavoz de Ciudadanos propunxo aspectos como la eliminación del aforamientu de los diputaos y los miembros del Conseyu de Gobiernu, o la llimitación del mandatu del Presidente a dos llexislatures

---

---

---