Morrió l'escritor y estudiosu de la lliteratura asturiana Xosé Bolado

la Voz OVIEDO

AGORA

Xosé Bolado
Xosé Bolado

Bolado yera miembru de númberu de l'Academia de la Llingua Asturiana

20 may 2021 . Actualizado a las 17:14 h.

L'escritor y estudiosu de la lliteratura asturiana Xosé Bolado morrió esti xueves en Madrid, onde residía. Bolado yera miembru de númberu de l'Academia de la Llingua Asturiana (ALLA) dende 1988.

Nacíu n'Uviéu en 1946 y vecín de Xixón, l'escritor y estudiosu llicencióse en Filosofía y Lletres na Universidá d'Uviéu y foi profesor n'institutos d'Asturies y de Madrid, onde se treslladó nos últimos años de la so carrera docente.

Vinculáu yá dende los años setenta al movimientu de reivindicación llingüística, foi'l responsable de la revista «Lliteratura», editada pola ALLA. Poeta n'asturianu y en castellanu, antólogu y críticu lliterariu, foi autor d'obres como «Antoloxía poética del Resurdimientu» (1989) y estudiosu la obra de Rosario d'Acuña.

L'Academia de la Llingua llamentó la muerte de Xosé Bolado, «un compañeru col que siempre se podía cuntar, un home comprometíu, cabal, atentu y cariñosu y, sobre manera, un amigu lleal qu'enxamás escaeceremos». Per otru llau, la Xunta pola Defensa de la Llingua mostró'l so «pésame más sentíu» pola perda «d'una persona bona que tamién echó un gabitu cuando la Xunta lu necesitó», informa Europa Press.