El IES Avelina Cerra de Ribeseya, premiáu con el Fierro Botas por «Tolos caminos lleven a Xixón»
AGORA
El proyeutu ye de un grupu d'alumnos y alumnes de segundu de Bachilleratu y conxuga cultura, historia y mediu ambiente
26 may 2021 . Actualizado a las 18:03 h.La Guía turística: Tolos caminos lleven a Xixón, del IES Avelina Cerra (Ribeseya) ye la idea normalizadora que resultó ganadora del Cuartu Premiu Fierro Botas, que concede la Conceyalía de Cultura del Conceyu de Xixón -pente medies de la Oficina de Normalización Llingüística-, nel so enfotu por facer alcordanza de la figura del xesuita y profesor Federico González-Fierro Botas y de la so querencia pola nuestra llingua y la so normalización social. Trátase d’agasayar y recordar la figura de Fierro Botas al empar que se venceya cola mocedá a la que tanto quixo y cola que se rellacionó de siguío nos sos años como enseñante.
El xuráu, presidíu por Manuel Ángel Vallina Rodríguez, conceyal de Cultura del Conceyu de Xixón, y formáu por Paz Fonticiella Gutiérrez (filóloga y profesora de llingua asturiana n’Educación Secundaria), Jaime González Fierro-Huerta (representante de la familia Fierro Botas, filólogu y Especialista en Filoloxía Asturiana y profesor de Secundaria), Pablo Xuan Manzano Rodríguez (en representación de l’Academia de la Llingua Asturiana) y María Xosé Rodríguez López (responsable de la Oficina de Normalización Llingüística, que fizo amás de secretaria) decidió conceder el premiu a la idea presentada por el IES Avelina Cerra de Ribeseya.
El xuráu quixo poner de manifiestu que’l proyeutu Guía turística: Tolos caminos lleven a Xixón, pal que la profesora d’asturianu Claudia Gutiérrez Lueje coordinó a un grupu d’alumnos y alumnes de 2u de Bachilleratu, consiste nuna idea mui actual, que pue tener una repercusión positiva na población, dando a conocer la historia y llugares del conceyu, poniendo en valir l’usu de los programes informáticos actuales, favoreciendo l’usu del asturianu y la so visibilidá al traviés de les nueves teunoloxíes, conxugando cultura, historia y mediu ambiente y que ta dirixida amás d’a xente pelegrino a diferentes públicos (ciudadanía de Xixón, turistes, families…).
El premiu consiste nuna pizarra electonica pal IES y un Diploma. L'actu d'entrega va a ser nel mes de xunu