¿Por qué'l profesoráu asturianu se xubila antemanadamente de manera mayoritaria?

Esti añu va ser un 47% más que nel cursu pasáu. Dende UXT reclamen una verdadera política de dignificación del oficiu docente


Redaccion

¿Por qué'l profesoráu asturianu se xubila antemanadamente de manera mayoritaria? Esa ye la entruga que planteguen dende'l sector d'enseñanza de FeSP-UXT d'Asturies, al recordar que de xineru a xunetu d'esti añu van xubilase un 47% más de docentes asturianos que'l cursu pasáu. «Paez obvio pensar que la pandemia tuvo una notable influencia nesti crecimientu. L'añu foi bien duru, la xestión de la crisis per parte de la Conseyería d'Educación nun ayudó, más bien al contrario, les instrucciones imprecises y poco clares, los continuos cambeos de rumbu y la política de treslladar tola responsabilidá al profesoráu nun provocaron un bon resultáu. Too recayó sobre la comunidá educativa y el desgaste producíu nun almite comparanza con nengún añu anterior», aseguren dende'l sindicatu, indicando que «la pandemia lo único que fizo ye agravar el problema».

Nesti sentíu, espliquen que'l retayu aplicáu nel presupuestu educativu arriendes de la crisis del 2008 nun se recuperó y el resultáu son unes plantiyes «insuficientes y escases». A lo que se suma que les ufiertes d'empléu públicu, «que nunca respondieron a les necesidaes reales, xeneraron unes tases d'interinidá inmorales». Poro, indiquen, «el profesoráu lleva xubilándose de manera antemanada de forma mayoritaria dende va munchos años».

Coles mesmes, recuerden que dende'l sector de la enseñanza d'UXT vien demandándose «una verdadera política de dignificación del oficiu docente», que non solo tien que ver col salariu «pero nun ye de recibu que los y les docentes asturianos seyan los peor pagos del país» y sí muncho que ver con «unes condiciones llaborales que faigan curioso esti trabayu». Amenorgar les ratios, la carga de trabayu alministrativu «que se multiplicaron nos últimos años» hasta'l puntu de cubrir «documentos absurdos que naide sabe pa qué sirven porque cenciellamente nun sirven pa nada« y la carga llectiva son dalgunes de les soluciones plantegaes, amás de planiar de manera correcta'l relevu xeneracional. «Les ufiertes d'empléu públicu tienen de responder a les necesidaes reales. Esperemos nun llegar tarde y que la falta de previsión nun provoque na enseñanza lo que yá tamos viendo en sanidá: la fuga de los más nuevos a otros territorios nos que les condiciones llaborales seyan más favorables», indiquen.

Conoce nuestra newsletter

Hemos creado para ti una selección de contenidos para que los recibas cómodamente en tu correo electrónico. Descubre nuestro nuevo servicio.

Tags
Comentarios

¿Por qué'l profesoráu asturianu se xubila antemanadamente de manera mayoritaria?

Cola ayuda de