Les clases van tar distribuyíes en tiempos de 45 minutos de duración, mentes que nos 15 minutos restantes va desinfectase, ventilar y saniar pal escolín siguiente
07 jun 2021 . Actualizado a las 18:17 h.La Escuela de Música Tradicional abrió esti llunes el plazu d'inscripción pal cursu 2021/2022. Dende la escuela quixeron apuntar que les clases van tar distribuyíes en tiempos de 45 minutos de duración, mentes que nos 15 minutos restantes la clase va desinfectase, ventilar y saniar pal escolín siguiente.
Amás, señalen que'l profesor va tar separáu del alumnu per una mampara al empar que nunca va quitar la mázcara pa dar clase, garantizándose asina'l cumplimientu de les midíes sanitaries, indiquen dende'l Conceyu.
Pa les clases, la escuela dispón de tecnoloxía MIDI, esto ye, punteros electrónicos con dixitación y soníu de gaita asturiana que fai posible l'ensayu y la clase ensin necesidá de quitar la mázcara de protección. Ente les disciplines que s'imparten na actualidá tán les de gaita, tambor, baille tradicional, pandereta, acordión diatónicu, rabel, zanfoña, tonada, investigación folclórica, preescolar, baille tradicional infantil, afitamientu d'especialidaes y afitamientu d'aficionaos.
La escuela almite alumnos dende los 4 años d'edá, y a partir de los 12 dan cuatro cursos pa cada disciplina o especialidá nos que se van recibir de forma progresiva les enseñances práctiques, al empar que llinguaxe musical necesariu pa cada disciplina. Al acabar estos cuatro cursos, va otorgase a cada alumnu'l correspondiente diploma acreitativu de cursar el grau elemental de la correspondiente disciplina, y l'alumnu pue siguir cursando'l nivel superior nos cursos d'afitamientu, informa Europa Press.