Llangréu va autorizar esti branu conciertos y propuestes culturales nes terraces

G.G. REDACCIÓN

AGORA

Terraza en Langreo
Terraza en Langreo

Les actividaes van poder desenvolvese los vienres, sábados, domingos y díes festivosen dos franxes horaries distintes: de 13.00 a 16.00 y de 18.00 a 22.00 hores

16 jun 2021 . Actualizado a las 11:14 h.

El Conceyu de Llangréu va poner de nuevu en marcha esti branu'l programa «Llangréu va sonate», que, al igual que l'añu pasáu, va dexar la organización d'actividaes culturales y actuaciones musicales en directo nes terraces hosteleres del conceyu. Un decretu robláu pola alcaldesa autoriza la presentación de solicitúes pa esi tipu d'actos dende esta selmana. Van poder desenvolvese tolos vienres, sábados, domingos y díes festivos dende agora hasta'l próximu 12 de setiembre.

«Ye una gran forma de dinamizar coles mesmes les actividaes del sector cultural y de la hostelería del conceyu. Falamos de dos tipos d'actividaes bien perxudicaes pola pandemia y que precisen ayuda y sofitu. La esperiencia del añu pasáu resultó bien positiva. Dio color y vida a les cais y atraxo xente a les terraces. Encántanos ver Llangréu animáu y esta flexibilización de les normatives sobre'l ruíu y el control de los horarios de los establecimientos permite tener una ufierta d'actividaes ensin alteriar de manera grave'l descansu de los vecinos y vecines», esplica l'alcaldesa, Carmen Arbesú.

La normativa establez dos franxes horaries mientres les que, nos díes señalaos, van poder programase propuestes de pequeñu formatu y baxa potencia, como conciertos, cuentacuentos, monólogos o maxa. Va haber un horariu de meudía, ente les 13.00 y les 16.00 hores, y otru de tarde, ente les 18.00 y les 22.00 hores. Los organizadores van ser responsables de caltener la contaminación acústica dientro de les llendes llegales, que son más estrictos nos casos de les propuestes destinaes al públicu infantil.

El cumplimientu de la normativa contra'l ruíu tien de ser escrupulosu puesto que, si coincidieren actividaes en llugares cercanos, el nivel sonoru podría aumentar hasta valores elevaos. Coles mesmes, tien de tenese en cuenta la normativa sanitaria contra la pandemia, col númberu máximu de veceros per mesa, la separación mínima ente grupos, la distancia de seguridá hacia l'esterior de la terraza y l'usu obligatoriu de mázcaros.