Ángel de la Calle gana'l Premiu Alfonso Iglesias de cómic n'asturianu cola obra «Paez que nun foi ayeri»

La Voz OVIEDO

AGORA

El director de la Semana Negra de Gijón, Ángel de la Calle, durante la presentación de la 34 edición del festival
El director de la Semana Negra de Gijón, Ángel de la Calle, durante la presentación de la 34 edición del festival EFE | Juan González

El xuráu destaca «el bon usu de los recursos del llinguaxe del cómic, la madurez y l'equilibriu que presenta»

17 jun 2021 . Actualizado a las 09:44 h.

La decimotercer edición del Premiu Alfonso Iglesias de cómic n'asturianu, qu'entama la Conseyería de Cultura, ganóla l'ilustrador y escritor Ángel de la Calle cola obra «Paez que nun foi ayeri».

Na acta del fallu, el xuráu destaca «el bon usu de los recursos del llinguaxe del cómic, la madurez y l'equilibriu que presenta, la intriga que crea la historia, les referencies metalliteraries al mundu del cómic, la fidelidá y l'interés históricu, amás de la calidá llingüística del trabayu». El xuráu, que quixo valorar tamién la calidá de les propuestes presentaes y la participación --que dobla a la d'ediciones anteriores--, tuvo presidíu pol director xeneral de Política Llingüística, Antón García, y integráu poles profesores Tamara Collar y Carmen Peña Calvo, y amás ilustradora y autora de cómics, la filóloga Claudia Elena Menéndez, la historiadora del arte Mercedes Menéndez, y el dibuxante y ganador de la edición del añu pasáu, Alberto Vázquez. Actuó como secretaria Laura Marcos, filóloga la Dirección Xeneral de Política Llingüística.

L'ilustrador Ángel de la Calle nació en Molinillo de la Sierra (Salamanca), pero vive dende neñu en Xixón. De la Calle, que combina la so actividá profesional cola organización de la Selmana Negra de Xixón, collaboró con publicaciones como Zona 84, El Víbora, Comix Internacional, Rambla o Heavy Metal. Ye autor de les noveles gráfiques Modotti. Una mujer del siglo veinte, y Pinturas de guerra, cola que llogró nel 2018 el premiu a la Meyor Obra d'Autor Español nel Salón del Cómic de Barcelona. Les sos obres foron publicaes en diversos países y traducíes a dellos idiomes.