Onís y Somiedu tienen yá los sos planes de sostenibilidá turística

G. G.

AGORA

El Principáu destina 1,1 millones

18 jun 2021 . Actualizado a las 19:38 h.

Los gobiernos central y autonómicu roblaron güei colos conceyos d'Onís y Somiedu dos convenios pa la execución de los planes de sostenibilidá turística de dambos conceyos que validen la puesta en marcha de les propuestes escoyíes pola Comisión Sectorial de Turismu en xunu de 2020.

Los proyectos van cuntar con financiamientu de les trés alministraciones, de manera que'l Gobiernu central y l'Executivu asturianu van facese cargu d'un 40% del costu caún, mientres que los conceyos van asumir el 20% restante.

Asina, la propuesta d'Onís tien un presupuestu de 800.000 euros y la de Somiedu xube a 1.870.000 y, en total, el Gobiernu d'Asturies destina a dambes iniciatives 1,1 millones.

El Plan de sostenibilidá turística de Somiedu articúlase en cuatro exes: la recuperación y puesta en valor del patrimoniu natural y etnográficu pal so usu turísticu, la meyora de la ufierta y la creación de productos sostenibles, y la promoción y comercialización del destín turísticu sostenible. El Conceyu va apurrir 374.000 euros.

El d'Onís, Ecoturismo nos Picos d'Europa, inclúi cinco llinies d'actuación: la creación de productos ecoturísticos basaos en recursos naturales y culturales, la promoción de productos llocales, la meyora del comportamientu ambiental, la mesma capacitación y xestión del plan, y les acciones de promoción y el Conceyu va dedicar 176.000 euros a esti proyectu.

Los convenios fueron soscritos pol secretariu d'Estáu de Turismu, Fernando Valdés, y pola conseyera de Cultura, Política Llingüística y Turismu, Berta Piñán, y los alcaldes d'Onís, José Manuel Abeledo, y de Somiedu, Belarmino Fernández.

Según Piñán, estos planes «nun tienen de vese puramente como proyectos turísticos, porque tienen la vocación de convertise en motores de l'actividá económica nes zones rurales ya incidir na vida de los sos habitantes y na dinámica social y cultural d'Onís y Somiedu».

Al so xuiciu, dambos proyectos tienen de mancomún la vocación de protexer los recursos y productos propios del so ámbitu territorial, l'amenorgamientu del impactu ambiental de l'actividá turística, el control de los fluxos de visitantes y el fomentu de la movilidá sostenible.

«El turista que vien busca autenticidá y que'l so viaxe respete'l territoriu. Y esto ye precisamente lo qu'ufierten los modelos que tamos impulsando dende los trés niveles de l'Alministración, nun exemplu de collaboración, n'Onís y Somiedu», señaló, pela so parte, el secretariu d'Estáu.

A esta primer convocatoria del Programa de planes de sostenibilidá turística en destín presentáronse otros seis conceyos: Castropol, Valdés, L.lena, Cabrales, Uviéu y Cangues d'Onís, amás de cuatro mancomunidaes: Comarca Oscos-Eo, Cinco Villes - Comarca Baxu Nalón, Contorna d'Avilés y Comarca de la Sidra.

La Conferencia Sectorial de Turismu celebrada'l pasáu marzu aprobó una nueva convocatoria ordinaria d'esti programa que va financiar la Secretaría d'Estáu de Turismu con 23 millones recoyíos nos Presupuestos Xenerales del Estáu.