La banda avilesina de rock ta estos díes rematando les canciones que van formar parte del so trabayu discográficu nuevu, que fai'l númberu 17 y lleva por títulu «Ente la niebla»
22 jun 2021 . Actualizado a las 19:44 h.La banda avilesina de rock Dixebra ta estos díes rematando les canciones que van formar parte del so trabayu discográficu nuevu, que fai'l númberu 17 y lleva por títulu Ente la niebla. La previsión ye entrar a la vuelta del branu nos Tutu Estudios de Corvera, baxo la producción de Sergio Rodríguez, pa grabar esti discu nuevu, que va poder sentise a finales d'añu.
Los últimos detalles y arreglos de les canciones tán faciéndolos nel pueblu l.lenizu de Chanos, d'au ye orixinariu'l guitarrista y principal compositor del grupu Primi Abella. Nesi llugar montaron un pequeñu set de grabación onde fundamentalmente tán dando acabación a la parte vocal del discu, grabando les maquetes previes a la entrada nel estudiu, que previsiblemente va ser a la vuelta del branu.
Esta producción nueva de Dixebra trátase d'una obra conceptual onde los cantares xiren alredor de la memoria histórica o colectiva de los asturianos y asturianes. La so idea ye tratar temáticamente la historia del pueblu asturianu del últimu sieglu, esto ye, dende la industrialización del país y el surdimientu d'una clas proletaria asturiana.
Al traviés de les lletres van tratase asuntos como la toma de conciencia política, les primeres lluches obreres, l'autoorganización, la emigración, la Revolución d'Ochobre, la guerra contra'l fascismu, la represión, l'exiliu, los fugaos, la fuelgona del 62, el paternalismu franquista, la transición, la reconversión industrial, les movilizaciones del naval, la llucha de les muyeres d'IKE, la mafia sindical, el desencantu o les movilizaciones actuales.
Ente la niebla va presentase en formatu llibru-cd, nel que van collaborar periodistes, escritores, profesores, historiadores, ilustradores o dibuxantes que, coles sos creaciones, van reflexonar sobre'l pasáu, el presente y el futuru de la clas obrera asturiana. Precisamente en socedíos, paisaxes y personaxes del pueblu de Chanos, que se tomen como exemplos de toa Asturies, tán basaos dellos de los testos de les composiciones nueves de la banda, informa Europa Press.