60 xoyes fotográfiques na mirada de tres muyeres

G. G.

AGORA

Zamora. Sarracin de Aliste.1990. © Cristina Garcia Rodero / Magnum Photos
Zamora. Sarracin de Aliste.1990. © Cristina Garcia Rodero / Magnum Photos

La esposición «Tres muyeres Magnum: Eve Arnold, Inge Morath y Cristina García Rodero» trai al Centru Niemeyer el prestixu de l'axencia de fotografía más importante del mundu

23 jun 2021 . Actualizado a las 16:49 h.

La esposición «Tres muyeres Magnum: Eve Arnold, Inge Morath y Cristina García Rodero», que va poder vese na Sala de Fotografía del Centru Niemeyer del 2 de xunetu de 2021 al 30 de xineru de 2022, ye una producción propia del Centru Niemeyer y supon un homenaxe a tres muyeres que superaron toles llendes y los tópicos del oficiu de fotógrafu. Estes tres pioneres ficieron que la muyer cuente'l mundu, represente la realidá y los suaños de la vida d'homes y muyeres al traviés de les sos miraes fotográfiques.

La muestra, comisariada por Rosa Olivares, presenta una antoloxía de los dos fotógrafes pioneres de la prestixosa axencia fotográfica Magnum, Eve Arnold y Inge Morath, según una representativa amuesa de les obres de la primer persona de nacionalidá española que pasó a formar parte de plenu de derechu de l'axencia en 2005: la fotógrafa Cristina García Rodero.

Estados Unidos. Ciudad de Nueva York. 1955. Estudio de actores. El actor estadounidense Paul Newman. © Eve Arnold / Magnum Photos
Estados Unidos. Ciudad de Nueva York. 1955. Estudio de actores. El actor estadounidense Paul Newman. © Eve Arnold / Magnum Photos

La esposición ta dedicada a estes tres muyeres que, de distintes formes, con distintos estilos y característiques personales y artístiques, fueron les primeres nun territoriu apoderáu, tovía anguaño, polos homes. Eve Arnold, Inge Morath y Cristina García Rodero son trés de les once muyeres qu'anguaño son miembros de plenu derechu de l'Axencia Magnum, d'un total de 99 miembros. Arnold y Morath fueron les dos primeres n'entrar nuna axencia creada por fotógrafos que yeren a partes iguales fotoperiodistes y artistes. García Rodero foi la primer fotógrafa española n'entrar nesta axencia. Nun hai nengún fotógrafu español que seya miembru de plenu derechu de Magnum.

Les tres, al marxe del so trabayu como fotoperiodistes, espunxeron en museos y galeríes d'arte, publicaron llibros y son consideraes tres de les más destacaes fotógrafes d'esa hestoria entá por escribir de la fotografía fecha por muyeres. Tres muyeres Magnum amuesa una curtia selección de dalgunos de los sos trabayos más destacaos, botones de muestra de cómo les sos miraes encetaron temes sociales, humanos, culturales; de cómo caúna d'elles avérase al mundu de la imaxe, de la representación del mundu y del estudiu de les persones, de cómo'l so aproximamientu al individuu, el so acercamientu al trauma, parte de muncho más allá d'una máquina, d'una lente.

Como asevera Rosa Olivares, comisaria de la esposición: «Caúna d'estes imáxenes fálanos de persones que miren a otres persones, porque los tres enfréntense abiertamente al individuu como clave de los problemes y de les soluciones. La importancia de la semeya ye vital en caúna d'elles, yá seyan celebridaes, artistes, políticos, intelectuales, neños, muyeres anónimes, persones desconocíes. Solamente hai una fotografía en tola esposición na que nun hai persones en primer planu. Solamente un paisaxe d'una ciudá, Nueva York, de nueche, col baturiciu de miles de persones que nun se ven. En toles demás fotografíes vamos atopar, sobremanera, muyeres: riques y famoses, probes y desconocíes, neñes y nueves. Muyeres porque la muyer y la so representación lo más amplia y abierta posible ye importante pa estes tres artistes. Pa elles falar del papel de la muyer na sociedá, mirar a los sos iguales como nun espeyu, ver les sos vides como parte de la sos propies, foi un actu esencial nel desenvolvimientu del so trabayu».