Los vecinos celebren un actu festivu pa llamar l'atención sobre la situación del espaciu de la Ilesia Vieya de San Pedru y el Texu
24 jun 2021 . Actualizado a las 05:00 h.El próximu domingu, 27 de xunu, a les 12 del meudía, un grupu de vecinos y vecines de La Collá (Siero), xunto a otres persones venceyaes al pueblu, van organizar un pequeñu actu col que quieren recuperar l'atención sobre un espaciu hestóricu y natural, el conxuntu de la Ilesia Vieya de San Pedru La Collá y el Texu de Ceñal, que requieren d'acciones pal so caltenimientu futuru y que tán desatendíos, a pesar de que l'espaciu foi declaráu Bien d'Interés Cultural en 2017.
L'actu va consistir nuna xuntanza vecinal informal na que va tomase sidra y falar del futuru del espaciu, asina como sentir dalgún tema tradicional a la gaita de Jesús, vecín de La Collá. Van participar tamién los poetes Virginia Gil, de la cercana parroquia de Samartino, y Inaciu Galán, venceyáu familiarmente a La Collá, lleendo dalgunos poemes como homenaxe al espaciu. Dirá tamién unes pallabres, Manuel Blanco, vecín de La Collá, y principal impulsor d'esti actu, esplicando la idea cola se fai esta xuntanza.
Según esplicaron los organizadores, «la idea ye xuntase pa falar del futuru del espaciu y recuperar l'atención sobre un llugar especial y de gran valir artísticu, hestóricu y natural, animando a les instituciones a tomar cartes nel asuntu y a los vecinos y vecines a tomar conciencia de la importancia del llugar».