La Rede Natural del Principáu unifica la so imaxe y refuerza la temporada de branu con un serviciu d'informadores nes zones de la costa
30 jun 2021 . Actualizado a las 12:30 h.La Rede Natural d'Asturies, qu'esta fin de selmana estrenaba imaxe nueva y unificada nel acrónimu RENA, empieza'l branu con más personal, ampliación d'horarios y servicios nuevos. El conxuntu d'equipamientos y recursos d'esta rede d'espacios naturales ta formada por 12 centros d'interpretación y 10 puntos d'información nos que trabayen mediu centenar de profesionales que vienen atendiendo a más d'un millón de visitantes al añu. Pa esta temporada de branu fueron 12 persones el total de trabayadores asignaos a esos equipos d'información y reforzóse la seguridá d'accesu a los llugares d'especial protección.
«Venimos anovando nesta llexislatura tola ufierta d'educación ya información ambiental venceyada a los nuestros espacios naturales, dende'l Parque de Picos a les reserves de la biosfera», recordó esti domingu'l conseyeru de Mediu Rural y Cohesión Territorial, Alejandro Calvo, na presentación de la imaxe corporativa nueva de la RENA nel centru d'interpretación de Munie??os, en Cangas del Narcea. Nesa imaxe nueva, caúna de les lletres del acrónimu RENA, representaes por un color distintu, amuesa'l variáu paisaxe y la biodiversidá d'Asturies: monte, valles, ríos y mar.
Calvo esplicó que, cola unificación baxo una mesma imaxe, incorpórase tamién un mesmu estándar de serviciu y refuérzase'l calendariu pa esta temporada nueva, con más medios «que son complementarios pa tener una ufierta d'información qu'ayude a la nuestra guardería del Mediu Natural tamién na función de protección ya información a los visitantes pa garantizar el caltenimientu de la biodiversidá».
Otra novedá d'esta temporada ye que, col aumentu de personal, puede ponese en marcha un serviciu itinerante d'informadores costeros nuevu que se va mover a sableres, arenales y estuarios de zones protexíes pa dar a conocer los sos valores ambientales. Esti dispositivu va esplegase, ente otres, peles árees de Penarronda, Barayo, Xagó, Verdicio o los Bufones de Pría y tamién va recabar información p'ameyorar la planificación de les acciones.
Tocantes a les zones regulaes al tráficu, cuéntase con cuatro ñlocalizaciones nos accesos a Llagos de Cuadonga (Cangues d'Onís), a Sotres y ruta del Cares (Cabrales), a Pandébanu (Cabrales) y la ruta del Alba (Sobrescobiu). Les dos últimes punxéronse en marcha esi añu.
La Rede Natural d'Asturies, que se constituyó como tal l'añu pasáu, ta integrada pol conxuntu d'espacios protexíos: cinco parques naturales, siete reserves de la biosfera y un parque nacional. El 40% del territoriu d'Asturies ta incluyíu en dalguna clase de protección ambiental. El Principáu ye la comunidá autónoma con mayor númberu de figures de reconocimientu internacional.
Decálogu de turismu responsable
Esti potencial convirtió al Principáu nun destín afayadizu y privilexáu pal turismu sostenible. Pa favorecer los valores de respetu y responsabilidá, la Conseyería de Mediu Rural y Cohesión Territorial tamién tien publicao un Decálogu del turista responsable na rede natural de Principáu, ellaboráu pola Dirección Xeneral del Mediu Natural, que recordamos darréu:
1. Sal a la naturaleza. Ta demostrao científicamente, la naturaleza ye fonte de bienestar y visitala refuerza'l nuesu sistema inmunolóxicu. Visita los espacios naturales, pero failo de manera responsable.
2. Plania antemanadamente. Procura consiguir con antelación tola información que precises de les fontes oficiales disponibles online. Visita les páxines webs naturalezadeasturias.es y turismoasturias.es.
3. Preparase bien. Nes tos escursiones lleva siempres tolo necesario, consulta la previsión meteorolóxica de l'área a visitar y realiza namás aquelles actividaes que seyan amañoses pa les tos capacidaes.
4. Más val prevenir. Toma toles precauciones necesaries pa prevenir la Covid-19. Al percorrer un espaciu natural protexíu o al visitar los Centros d'Interpretación respeta les normes establecíes.
5. Evita les aglomeraciones. Procura visitar los espacios naturales en grupos pequeños y evita aquelles árees en que se prevea una llegada masiva de visitantes.
6. La salú de toos ye lo primero. Si t'alcuentres mal o tuvisti espuestu a la Covid-19 nos postreros 14 díes, cancela la to escursión y queda en casa.
7. Respeta la naturaleza. Procura ser respetuosu cola flora y la fauna. Nos espacios naturales protexíos estrema'l procuru pa nun alteriar a los animales o alteriar la vexetación.
8. Nun dexes buelga. Cuando visites los espacios naturales protexíos recueye los tos esperdicios y nun causes nenguna alteración na naturaleza. Que nun quede rastru del to pasu per ellos.
9. Respeta a la población local. Hai xente que vive tol añu nestos espacios naturales. Recuerda qu'has de respetar los sos usos y costumes, vixila nun apexar caminos o viviendes y nun entres en terrenes particulares.
10. Ayuda a la economía llocal. Visitando espacios naturales protexíos cercanos a la to residencia vas ayudar a caltener l'actividá económica nellos. Una vez ellí escueyi, siempre que puedas, a les empreses de la redolada.