El Principáu perfila actuaciones «prioritaries» en playes pa desaniciar los efectos del cambiu climáticu
AGORA
El conseyeru de Mediu Rural y Cohesión Territorial, Alejandro Calvo, avanza que'l so departamentu trabaya yá na ellaboración d'una planificación sobre necesidaes y actuaciones
29 jun 2021 . Actualizado a las 13:42 h.El conseyeru de Mediu Rural y Cohesión Territorial, Alejandro Calvo, avanzó esti martes que'l so departamentu trabaya yá na ellaboración d'una planificación sobre les necesidaes y actuaciones prioritaries nes playes de la rexón pa encarar los efectos que pueda tener el cambiu climáticu nes mesmes.
El diputáu de Ciudadanos Luis Fanjul preguntó al conseyeru por esti tema, poniendo de manifiestu los efectos que la xubida del nivel del mar o l'aumentu de temperatura de l'agua puen tener sobre los ecosistemes de la mariña.
La mariña asturiana, esplicó Calvo, ye un espaciu natural «protexíu prácticamente na so totalidá», polo que les competencies na so xestión tán compartíes cola Alministración del Estáu. Pa protexer los valores medioambientales, el Principáu trabaya en cinco proyectos de restauración ambiental.
El titular de Mediu Rural esplicó amás que na primer selmana de xunetu va celebrase una xunta pa territorializar los fondos Next Generation destinaos a la preservación de la mariña y la recuperación de playes.
Calvo señaló amás que l'efectu del cambiu climáticu va ser importante tamién nes infraestructures portuaries. El Principáu, dixo, yá ta trabayando p'analizar la posible recurrencia de les veníes d'agua en coordinación cola alministración del Estáu, informa Europa Press.