Donen un cartel inéditu d'una feria asturiana de 1946

La Voz XIXÓN

AGORA

Muséu del Pueblu d'Asturies

«Una maraviya industrial. Nun espaciu de lleenda. Nuna sablera de moda», dicía'l lema escoyíu pa promocionar la Esposición de Productos Rexonales del Noroeste d'España

01 jul 2021 . Actualizado a las 05:00 h.

El Muséu del Pueblu d'Asturies recibió la donación d'un cartel desconocíu dafechu que nun ta representáu en nenguna colección pública asturiana nin española, a pesar d'anunciar un eventu que tuvo gran trescendencia nel so momentu. Trátase del cartel anunciador de la Esposición de Productos Rexonales del Noroeste d'España, que se celebró en Xixón, nos Campos Elíseos, del 1 al 31 d'agostu de 1946, y que dempués s'ampliaría hasta'l 8 de setiembre.

El cartelu foi donáu al muséu por Fernanda Suárez Gutiérrez, fía del empresariu astur-mexicanu Antonio Suárez, qu'acaba de ser nomáu Fíu Adoptivu de Xixón. Suárez yá donó al muséu en 2014 un importante conxuntu de documentación perteneciente a la Congregación de N. S. de Cuadonga de Naturales del Principáu d'Asturies en Madrid, que foi la primer asociación integrada puramente por emigrantes asturianos, fundada en 1742.

El cartel recién donáu ta espuestu na recepción del muséu, onde va poder vese mientres los meses de xunetu y agostu. La so incorporación a la colección del Muséu del Pueblu d'Asturies xúnese a otru que tien el muséu de la VI Feria de Muestres Asturiana de 1929, y a la colección de tarxetes postales colos cartelos d'estes feries celebraes nos años venti. Y ye una aportación más a la política de recuperación de carteles asturianos realizaos antes de la implantación de Depósitu Llegal en 1958

El cartelu

El cartelu, del que les sos midíes son 90 x 61,5 centímetros, foi dibuxáu por Joluca (José Luis Catrain) ya impresu en Litografía Luba, que foi ún de los talleres litográficos más importantes de Xixón. Estableciérase en 1927, centrando la so actividá na realización d'etiquetes, impresos, estoxos de cartón pa conserves y cartelos, y desapaeció hacia 1975.

Del autor del cartel, José Luis Catraín, sábese bien poco. Estudió na Escuela de Comerciu de Xixón, onde llogró notes sobresalientes en dibuxu, y trabayó como dibuxante profesional nos años cuarenta y cincuenta.

El cartel reinventa'l llinguaxe gráficu de los años venti, cuantimás na presencia icónica de la industria, el tráficu marítimu y el reclamu turísticu de la sablera, trés elementos definitorios que resumen la esencia del Xixón contemporaneu, identidá que'l cartel reafita nel so lema: "Una maraviya industrial. Nun espaciu de lleenda. Nuna sablera de moda".

Reflexa claramente la influencia de la obra cartelística, inclusive na so tipografía, de Germán Horacio (Xixón, 1902-Ciudá de Méxicu, 1975) y de Mariano Moré (Xixón, 1899-Uviéu, 1974), nos sos trabayos de publicidá pa les Feries de Muestres de los años venti.

A les chimenees fumientes contraponse'l fragmentu del paisaxe costeru, con esa sablera con sombrielles, toldos y casetes, pero'l calquier gráficu de los tresatlánticos camuda pol cascu d'un buque en construcción, como metáfora non yá de la tradicional industria naval xixonesa, sinón, tamién, como alegoría de la reconstrucción tres la Guerra Civil.

El cartel coronáse colos escudos y emblemes de les rexones participantes. Asina, a la izquierda, l'escudu d'Asturies y a la derecha, el de Llión, abrazaos pola Cruz de Santiago en referencia a Galicia.

La esposición de 1946

La Esposición de Productos Rexonales del Noroeste foi promovida pol Ministeriu d'Industria y Comerciu, y el Conceyu de Xixón, y el so director técnicu foi José María Barbáchano, que yá participara na organización de la I Feria de Muestres d'Asturies en 1924.

El certame axuntó a empreses gallegues, lleoneses y asturianes, anque prácticamente la mayoría, más d'un centenar, yeren asturianes, mientres qu'otres trés gallegues, 13 lleoneses y seis d'otros llugares del estáu.

Ente los participantes asturianos destacaron los pabellones de la fábrica de conserves Hijos de Carlos Albo (Candás); Anís de La Asturiana, Hijos de Francisco Serrano S. A. (Uviéu); la fábrica de lloza de La Asturiana (Xixón) o la Fábrica Nacional d'Armes d'Uviéu.

L'espaciu de la esposición ocupaba una superficie de 15.200 metros cuadraos. Foi una esposición bien propagandista, cola que pretendía dase una imaxe de recuperación económica d'España siete años dempués del acabu de la Guerra Civil.

Con esta esposición la ciudá de Xixón pretendía recuperar l'ésitu de les siete feries de muestres asturianes celebraes ente 1924 y 1930, que van tener la so continuación a partir de 1965 hasta l'actualidá.