«Xixón con remangu»: «merchandising» que sorraya'l valir del paisanaxe y el calter xixonés

Xixón con remangu. Esti ye l’eslogan nuevu que va llucir nos productos promocionales recién estrenaos de Xixón Turismu que se presentaron güei en Casa Paquet. Tolos productos van poder mercase nes oficines d’información turística, Infoxixón, asitiaes na mesma Casa Paquet, na plaza Fermín García Bernardo, o en La Escalerona.

El merchand nuevo inclúi camisetes, bodies de ñacaru, bolses de tela, tazes, sudaderes y gorres. Nel diseñu empléguense personaxes representativos del calter xixonés (les sardineres, les cigarreres, un bañista de San Llorienzo, surferos, músiques, un mineru…) ya ilustraciones de recursos como Llaboral Ciudá de la Cultura, el muru San Llorienzo, Pelayu, Tabacalera, el Xovellanos o el castillete de la mina La Camocha.

Xixón Turismu lleva años faciendo merchand como soporte non convencional de promoción turística. Nesta ocasión, roblóse un alcuerdu cola marca asturiana Puru remangu, un proyeutu cultural y creativu basáu en da-y puxu y visibilidá a la identidá de les muyeres asturianes dende una perspectiva feminista y anovadora. La llínia de productos tenía de tener el paisanaxe como filo conductor de la mesma.

Esta collaboración enmárcase nel Plan d’Aición de Turismu Sostenible de Xixón 2020, con aiciones que puxen pola conocencia de la cultura’l país polos visitantes. El conceutu de la llínia creada desplícase nuna postal que se da colos productos (orixinal n’asturianu y con torna al castellanu, francés, inglés y portugués). La producción va facese en tiraes pequeñes axustaes a la demanda, con proveedores llocales y algodón orgánicu.

---

---