Foi en marzu del añu pasáu cuando l’andancia sorprendió a tola comunidá educativa. D’un día pa otru los centros pesllaron les sos puertes. Too camudó demasiao rápido y nin los docentes, nin l’alumnáu, nin les families taben preparaos pa una situación tala. Tando asina les coses, la incertidume de lo que diba pasar y lo poco avezaos que tábemos cola educación a distancia dio pocu marxe pa l’adaptación necesaria. Nesti contestu ye normal qu’hubiere confusión, estrés y ansiedá nel profesoráu. La Covid pasó factura pola brusquedá de les midíes adoptaes. Una encuesta ellaborada pola Central Sindical Independiente y de Funcionarios (CSIF) a 3.500 profesionales de la educación revela que’l 94% de los docentes na primera ola sufrieron un desgaste emocional pola sobrecarga de trabayu que provocaron les clases on line. Depués vieno setiembre y les escueles, institutos y universidaes españoles reabrieron otra vuelta les sos puertes y volvió la incertidume. Amás de la superación de l’ansiedá y de redoblar el trabayu, foi obligao cumplir col rigor de los planes de continxencia ellaboraos: distancies de seguridá, los xeles hidroalcohólicos, ventilación nes aules. Ye verdá que los estudiantes respetaron normes con una gran madurez y naturalidá nunos momentos enforma difíciles. De toles formes, por cuenta de la pérdida de la interacción colos compañeros y de l'alteración de les rutines, la situación dexó-yos tamién rastru. La Confederación Estatal d'Asociaciones d'Estudiantes (CANAE) fizo un sondéu a 743 alumnos, que definieron l’añu escolar con tres palabres: agobiu, estrés y ansiedá con mayor presencia ente’l xéneru femenín. Per otru llau, los estudiantes que cursaron Bachilleratu (82,2%) y ESO (70%), fueron los que más sufrieron esta situación tan cambiante que los obligó a adaptase apriesa al emplegu de la tecnoloxía pa deprender y non pa entretenerse o comunicase. Al empar, les families convirtiérose en guíes y aprendices p’ayudar a la reciella, mientres que los docentes camudaben les sos estratexes pedagóxiques pa que l’aprendizaxe fuere posible.
«Educar» ye dalgo mui importante, yá qu’obliga a los estudiantes a pensar, a xulgar, a entender… en definitiva, a saber. Ensin dulda la educación ye’l motor de crecimientu de la sociedá. Los grandes profesores de la Antigüedá teníenlo claro: l’aprendizaxe produzse a traviés del diálogu, la conversación y la interacción, dalgo que na primera ola de l’andancia quedó interrumpíu nel mes de marzu y que se retomó’l cursu pasáu, nel qu’hebo más contratación de profesoráu. N’Asturies, gracies a los 754 docentes más contrataos, tolos estudiantes d’hasta terceru de la ESO pudieron dir a les aules día tres día. Cuntóse tamién con una partida de portátiles qu’ayudó nesi llabor, lo qu’en total supunxo unos 43 millones, qu’ayudaron a aliviar dalgo la situación provocada pola Covid.
El referente internacional en Neuroeducación Francisco Mora nun entiende les crítiques qu’una parte de la sociedá fai al profesoráu; paez-y que merez un reconocimientu al ser la pieza central d’un engranaxe educativu, yá que conecta cola realidá del alumnáu, de la so familia, de los sos collacios de trabayu y cola organización a la que pertenez. Esti engranaxe detúvose na andancia y con él tolo demás y eso tien qu’ayudar pa reflexonar sobre’l valor y les característiques de cada una de las pieces, en particular de los docentes. La reflexón tien que llevanos a cambios, pero nun hai cambios máxicos. Unu de los mayores y más signficativos pedagogos, Paulo Freire, pon de manifiestu la necesidá de la utopía y de la esperanza: «La educación nun camuda’l mundu, camuda a les persones que van camudar al mundu». Ensin dulda’l llabor de los docentes que tuvieron que facer un gran esfuerzu p’adaptase a les nueves circunstancies nun añu onde l’andancia nun dio tregua, dio-yos esperanza y certidume nuna situación tan complexa.
El presidente del gobiernu púnxo-y una «matrícula de honor» a la respuesta del nuestru sistema educativu, que supo plantar cara a l’andancia. Espresó’l so arguyu porque «España fuere unu de los pocos países del mundu que caltuvo los sos centros escolares abiertos a lo llargo del cursu», dalgo que fizo gracies al comportamientu de tola comunidád educativa. Nesti sen, pa la ministra d’Educación los profesionales del sector educativu, que fueron valientes y xenerosos, «merecen el más altu reconocimientu social y la nuestra fonda gratitú»; tamién l’alumnáu que foi «disciplináu nel cumplimientu de les midíes sanitaries; y les families que sostuvieron física y moralmente esti engranaxe». Pues l’añu viniente, onde s’espera una vacunación pa los más mozos, aguardamos que seya crucial, non solo porque se llogre vencer a l’andancia, sinon porque la nueva llei, la LOMLOE, un símbolu de «igualdá de oportunidaes» yá que busca la equidá, la inclusión y la modernización del sistema educativu, abra’l camín pa que l’accesu a la educación, un bien tan preciáu y fundamental, seya suficiente garantía pa que nengún estudiante quede atrás.