12 rutes culturales per Xixón

La Voz REDACCIÓN

AGORA

Xixón Turismu llanza la publicación CulRutes, qu'ofrece la oportunidá de descubrir los secretos de la villa de Xovellanos

07 jul 2021 . Actualizado a las 12:50 h.

Xixón Turismu llanza la publicación CulRutes. Rutes culturales per Xixon. Estes rutes permiten percorrer y conocer Xixón dende doce perspeutives mui distintes, pero siempre con un puntu en común: el patrimoniu históricu y cultural de la villa de Xovellanos. Unos itinerarios empobinaos a un espectru ampliu de persones, con intereses tan variaos como’l cine, la lliteratura, l’arte, la historia o el feminismu. Y too al traviés d’unes rutes culturales qu’ofrecen la oportunidá de descubrir los secretos de Xixón d’una forma entretenida y nunes poques hores. Ye una esperiencia que va gustar tanto a locales como a visitantes y que puede facese de forma individual o con familiares y amistaes.

Estos itinerarios percuerren les siete maraviyes de Xixon pa pasar un día en familia; amuesen cómo evolucionó la ciudá al rodiu de la vida y obra de les muyeres; permiten descubrir el patrimoniu modernista bayurosu qu’hai en Xixón; siguen los pasos de la figura más decisiva pa la villa: Gaspar Melchor de Xovellanos; recalquen los avances qu’esperimentó la ciudá nos dos últimos sieglos d’historia; espliquen el patrimoniu industrial, tan importante pal desarrollu económicu y social de la villa; desvelen percorríos interesantes al traviés de la periferia de Xixón; descubren los secretos del popular barriu de Cimavilla, cuna de pescadores, artesanos y cigarreres; proponen un percorríu que cautiva al traviés de les escultures y del arte urbanu de la ciudá; esponen cómo fueron los años de la Guerra Civil, dende’l golpe militar hasta la toma de Xixón poles tropes franquistes; recueyen dalgunos de los escenarios nos se rodaron películes emblemátiques y descubren ónde taben va años les sales de cine; y tamién falen sobre los llugares pelos que trescurren delles obres lliteraries que tienen a la ciudá como protagonista. 

La publicación puede descargase na páxina web del Conceyu o solicitase n’Infogijón. Amás, tien un códigu QR qu’enllaza cola web municipal pa les persones que quieran ampliar información. La edición tien tres versiones: castellanu, castellanu/inglés y castellanu/francés.